Нобеловата награда за мир за колумбискиот претседател

Хуан Мануел Сантос ја добива наградата за своите напори за ставање крај на војната во Колумбија, соопшти претседателот на Нобеловиот комитет, Каси Кулман Фиве. Со наградата му се оддава и признание на колумбискиот народ, затоа што не кренал раце од надежта и мирот.

Владата на Колумбија и бунтовниците на Фарк за мировен договор преговараа цели четири години. Тој беше потпишан на 26 септември, но потоа на референдум населението со тесно мнозинство го отфрли договорот. Досега и Сантос и шефот на Фарк, Родриго Лондоњо, се држат до прекинот на огнот. Во моментов  се водат преговори со противниците на договорот за мир околу евентуални подобрувања на документот. Војната меѓу колумбиската држава и Фарк почна пред 52 години и е најдолгата војна во Латинска Америка.

Годинава, инаку, имаше рекорден број номинации за Нобеловата награда за мир - 376. Според Нобеловиот комитет, номинирани беа 228 лица и 148 организации.

Нобеловата награда за мир е една од најреноминарите одликувања во светот. Од основањето, во 1901 година, досега е доделена 97 пати, а носители беа 109 лица и 25 организации. Првата Нобелова награда за мир во 1901 година ја добија Швајцарецот Анри Дунан и францускиот пацифист Фредерик Паси. Дунан е основач на Меѓународниот комитет на Црвениот крст.

Нобеловата награда за мир, според последната желба на Алфред Нобел, треба да се доделува на лица кои покажале најдобри резултати во напорите за поголемо братство меѓу нациите, на оние кои укинале армии или организираат мировни конгреси. Првата Нобелова награда за мир била дотирана со 150.800 шведски круни, а во меѓувреме наградата е дотирана со осум милиони круни или околу 830.000 евра. Познати добитници на Нобеловата награда за мир, меѓу другите, се и Нелсон Мендела (1993), Барак Обама (2009) и Мајка Тереза (1979).