Бербок: Го имате мојот збор, ЕУ нема да ве остави на цедило

„Го имате мојот збор, ЕУ нема да ве остави на цедило“, порача денеска  шефицата на германската дипломатија Аналена Бербок при посетата на Скопје, испраќајки силни пораки за поддршка на македонските евроинтеграции. Таа вели дека  уставните измени мора што поскоро да се донесат во македонското Собрание, со цел во декември да се отворат преговарачките кластери, со што земјата конечно ќе може да стане членка на ЕУ. 

„Европската Унија вети и ќе остане на зборот - чекорот што сега треба да се направи е да се спроведат уставните измени“, порача Бербок на прес-конференција со шефот на македонската диппломатија, Бујар Османи. Нудејќи ја германската поддршка, но и поддршката на ЕУ за што  побрз напредок на земјата во евроинтеграциите, таа вели дека е свесна оти процесот на менување на Уставот не е воопшто лесна работа и дека за него е потребен општествен консензус. 

„Ќе дојдам во декември повторно, бидејќи треба да се разговара со сите демократски фактори во земјата. Знаеме колку е тешко кога се прават уставните измени, за секој глас треба да се борите. Така е и во Германија со цел да не може толку едноставно да се смени Уставот. Затоа мора да се седне на заедничка маса со опозицијата - тоа е силата на демократијата“, вели Бербок. 

Компромиси и отстапки 

Порачувајќи дека го цени и почитува тоа што земјата го направи досега со неколкуте компромиси и отстапки (промена на името, но и со обврската за промена на Уставот), Бербок потенцираше дека е свесна оти договорот којшто земјата го постигна со Бугарија не беше воопшто лесен чекор.  

„Уставот не е нешто што се менува постојано, туку тоа се важни чекори и можам да разберам дека се дебатира за тоа. Се работи за сопствениот идентитет, јазик и култура. Со оваа храбра одлука можат пристапните преговори официјално да започнат“, вели Бербок, испраќајќи јасен сигнал од Скопје дека членството на земјата во НАТО и ЕУ е од огромно значење. 

Шефицата на германската дипломатија особено се осврна на проблемот со предолгото чекање пред вратите на ЕУ, со оглед на тоа дека Северна Македониај го започна процесот пред 19 години, неколку месеци пред да започнат преговорите со Хрватска, која пак веќе десет години е членка на Унијата. Со цел да се спречи одливот на младите од земјата, во потрага по подобар живот и работа, таа вели дека мора да се направат храбри чекори напред кон Унијата. 

„Ако не сакате сите млади да отидат во Европа, треба Европа да ја донесете овде. Сега кога мора да се промени Уставот, можам само да ве охрабрам. Не само Владата, туку искористете ги сите расположливи средства за процесот да продолжи и тоа во наредните месеци. Од вас очекувам реформи“, порача Бербок. 

Северна Македонија ќе ја направи посилна ЕУ, Унијата живее од вашата разноликост, во различјето сите сме обединети - се само дел од пораките кои ги испрати шефицата на германската дипломатија. 

„Како Македонки и како Македонци вие докажавте дека никој не може да ве сопре на патот кон ЕУ. Оптимист сум дека до декември ќе ја искористиме шансата за во Унијата“, вели таа. 

Клучен момент

Шефицата на германската дипломатија доаѓа во Македонија во еден многу важен момент за земјата, која се наоѓа на чекор пред отпочнување на процедурата за уставни измени, со која Бугарите треба да бидат вметнати во Преамбулата. За тоа е потребно двотретинско мнозинство.

Шефот на македонската дипломатија, Бујар Османи и порача на Бербок дека доаѓа во еден многу важен момент за земјата. 

„Северна Македонија има преземено обврски кои мора да ги исполни за членство во ЕУ. Овојпат тоа зависи само од нас. Во Унијата не се интегрира само Владата, туку целата држава и затоа секој од нас треба да понесе одговорноста. да ги завршиме внатрешните процедури“, дециден е Османи. Тој на прес-конференција по средбата со Бербок, оцени дека Германија како една од најмоќните држави во Европа и најсилен пријател, „стана штит на предизвиците“ со кои се соочува Северна Македонија. „На секој обид да се билатеризира процесот, Германија прва реагира дека тоа не е добро за процесот“. Силната поддршка му дава надеж дека Македонија припаѓа во ЕУ. 

„Германија испрати силни пораки до граѓаните, тоа е најдобриот начин за да се спречи влијанието на трети сили кои не сакаат напредок и развој на региониот“, вели Османи. 

Шефицата на германската дипломатија Аналена Бербок во Скопје ќе разговара со претседателот Стево Пендаровски, премиерот Димитар Ковачевски, претставници на парламентот и лидерот на опозициската ВМРО-ДПМНЕ, Христијан Мицкоски во обид да го откочи  патот кон уставните измени. 

Главната порака на Бербок се однесува на уставните измени со кои треба да се внесат Бугарите и другите заедници во највисокиот правен акт на Северна Македонија. Посетата на Бербок го подвлекува „ангажманот на германската сојузна влада за регионот“ на Западниот Балкан.