Бран штрајкови по железничката несреќа во Грција

Во знак на револт поради потфрлањето на државата во врска со тешката железничка несреќа во Грција пред една недела, јавниот живот во земјата е речиси парализиран од штрајкови. Морнарите, возачите на автобуси, лекарите и наставниците како и целиот јавен сектор стапија во 24-часовен штрајк. Во поголемите градови Атина и Солун дојде до хаос на патиштата. И фериботите останаа во пристаништата, така што многу острови се отсечени од копното.

Критики за приватизацијата

На штрајкови повикаа големите синдикати во земјата. Тие од политичарите бараат целосна истрага на железничката несреќа во која загинаа 57 лица.

Критикувана е и политиката за приватизација и се бара да ѝ се стави крај. Железницата, како што се вели, била криминално запоставена од сите влади во последните две децении. „Ќе се избориме за безбедна железница, за да не се повтори таква трагична несреќа како во Темпи“, се вели во соопштението на најголемиот синдикат на железничарите. Од синдикатот на наставниците порачаа: „Не е време за молчење, време е да се зборува и време е за борба“.

Штрајкот е врв на многу протести во земјата по несреќата, на кои делумно имаше и безредија. Политичките аналитичари истакнуваат дека приватизацијата како таква во овој случај воопшто не е виновна за сегашната состојба. Според нив, приватизиран е само железничкиот транспорт, кој со години е во рацете на италијанска железничка компанија. За инфраструктурата на грчките железници и за персоналот сѐ уште е одговорна грчката државна железничка компанија ОСЕ.