Над 800 илјади жители ја напуштиле Бугарија за 10 години
4 октомври 2022
Населението во Бугарија се сведе на 6.519.789 луѓе, покажуваат податоците на Националниот статистички институт од националниот попис што се одржа во периодот 7 септември - 10 октомври 2021 година. Во последните десет години, од 2011 до лани, населението во Бугарија е намалено за 844.781 лица, што е еднакво на 11,5%. Главните фактори за намалувањето на населението се природното движење: разликата меѓу бројот на новородени и починати, и емиграцијата.
Раст на населението над 65 години
Во Бугарија живеат 3.383.527 или 51,9% жени, и 3.136.262 мажи, односно 48,1% од населението. Има 927 мажи на 1000 жени. Населението на возраст од 65 години и повеќе е 1.532.667, а 4.069.400 луѓе се во возрасната група помеѓу 15 и 64 години. До 7 септември 2021 година во државата имало 5.257 населени места, од кои 257 се градови и 5.000 села. Во градовите живеат 4.782.064 луѓе (73,3%), а во села 1.737.725 луѓе (26,7%). Над 100 илјади луѓе живеат во шест бугарски градови - Софија, Пловдив, Варна, Бургас, Русе и Стара Загора.
Над 1,2 милиони жители во Софија
Населението на Софија е 1.274.290 луѓе. Најмалиот град во Бугарија е Мелник со население од 161 жители. Најголемото село е Лозен во Софиската област со население од 6.471 жители. Од Националниот статистички институт објавија дека повеќе податоци ќе бидат објавени во ноември и декември, вклучително и за етничката припадност, религијата и миграцијата.