Инфлацијата во Германија веројатно нема да се зголемува

Треба да се очекува намалување на цените на енергијата, што ќе значи и олабавување на стегите од порастот на цените, изјави за Ројтерс ТВ, Моника Шницер, шефица на т.н. економски мудреци (економски советници на владата, н.з.) во Германија. „Доколку не се случи нешто непредвидено, тогаш врвот (на инфлацијата, н.з.) е достигнат“, оценува Шницер.

Цените во 2022 година се зголемија како никогаш досега од постоењето на Сојузна Република Германија. Стапката на инфлација се зголеми во просек за 7,9%. Тоа беше резултат на скапите енергенси и прехранбени намирници, чии цени се вивнаа во височина поради руската инвазија на Украина. Стапката на инфлација беше највисока во октомври - 10,4%, по што во ноември падна на 10%.

Европската централна банка, според Шницер, треба да презема „одмерени“ чекори. Доколку состојбата со инфлацијата се релаксира, тогаш ЕЦБ не би требало да реагира претерано во однос на висината на каматите, уверена е Шницер.