Милатовиќ ќе биде нов претседател на Црна Гора

Крај на една ера во малата Црна Гора: по повеќе од 30 години на власт - последно како претседател - Мило Ѓукановиќ загуби на изборите. Според последните проекции, јасен победник на вториот круг на изборите за претседател е 36-годишниот Јаков Милатовиќ, кандидат на младото движење „Европа сега“.

Милатовиќ профитираше од промената на расположението на 540.000 граѓани со право на глас. По првиот круг тој заостануваше, но во вториот круг не беше поддржан само од неговите сопствени проевропски настроени поддржувачи, туку и од оние на просрпските партии и оние на Српската православна црква, која е контролирана од Белград.

Милатовиќ студирал економија во САД. Во Европа работел во Дојче банк во Франкфурт и во Европската банка за обнова во Лондон. Тој се смета за реформатор, кратко време беше министер за економија во Црна Гора и победи на изборите за градоначалник во главниот град Подгорица, кој долго време важеше за упориште на Ѓукановиќ.

Смената на долгогодишниот владетел Ѓукановиќ од страна на досега непознатиот млад политичар Милатовиќ веројатно ќе има влијание и на парламентарните избори во јуни. Со оглед на тоа што политичките табори меѓусебно се блокираат, во моментов во Црна Гора има преодна влада. Милатовиќ и неговото движење „Европа сега“ сакаат да го променат тоа, а сакаат и да ги забрзаат преговорите со ЕУ за пристапување, кои се одолговлекуваат веќе 11 години.