Палевски тврди дека е невин за убиството на Вања Ѓорчевска

Обвинетите Љупчо Палевски, Боре Видевски, Велибор Манев, Влатко Кешишов, како и таткото на Вања, Александар Ѓорчевски, се изјаснија за невини на почетокот на судењето за убиствата кои минатата година ја потресоа државата.

Обвинителството тврди дека извршител на убиствата е Љупчо Палевски-Палчо, додека останатите биле соизвршители и помагачи. Им се заканува казна од 10 години до доживотен затвор.

Обвинителката Жаклина Крстевска, по барањето на мајката и сестрата на Вања, побара судењето да биде затворено за јавност, но судот го одби барањето.

Палевски: Јас сум жртва

Палевски во изјавата рече дека е жртва на монтиран политички процес, и тврдеше оти нема докази за негова вмешаност во убиствата. Таткото на Вања, Александар пред судот изјави дека не е виновен, и оти во текот на процесот ќе даде придонес за расчистување на вистината. 

Обвинителството тврди оти обвинетите заедно испланирале грабнување на 14-годишното девојче со цел да присилат член на нејзиното потесно семејство да даде парични средства за откуп. Претходно, на 22 ноември 2023 година, тие наводно го грабнале Панче Жежовски од Велес, со цел да му го земат возилото, а потоа и го убиле. Безживотните тела на Вања Ѓорчевска и Панче Жежовски, беа пронајдени во близина на Скопје и Велес на 3 декември 2023 година.