МНР: Македонско семејство евакуирано од Газа

Татко и две деца од Северна Македонија, по неколкунеделни напори се евакуирани од Појасот Газа и се на пат кон дома. Министерството за надворешни работи информираше дека тие безбедно ја напуштиле Газа и во придружба на вршителот на работи во македонската Амбасада во Каиро, Елма Алторок, се упатиле кон египетскиот главен град, од каде ќе го продолжат патувањето кон дома. 

Со нив, преку Рафах е евакуирана и мајката на децата, која има палестинска патна исправа. Во Газа има уште двајца македонски граѓани. Овaa брачна двојка, исто така е вклучена во официјалните листи за евакуација. 

„Нивното напуштање на Газа зависи од околностите на терен, односно безбедносната проценка кој дел од Газа е најпогоден, а со тоа и потребата за итна евакуација на странските државјани“, велат од МНР.

Се чека евакуација на брачна двојка

Министерството за надворешни работи преку својата дипломатска мрежа во Каиро и Тел Авив останува во постојана комуникација со надлежните институции на Египет и Израел, како и со македонските државјани до завршување на нивното целосно евакуирање.

Пограничните власти на Газа објавија список со околу 600 странски државјани и лица со двојно државјанство од повеќе земји на кои ќе им биде дозволено да ја напуштат Газа, меѓу кои беа и македонските државјани. Преминот Рафах беше отворен по повеќе од три недели целосна блокада, со што се отвори можност за евакуација на бројни граѓани коишто останаа заглавени во Газа.

Во првата група имаше околу 400 лица со странски пасоши кои ја напуштија Газа откако беше постигнат договор за отворање на граничниот премин.

Изминатиот период десетици македонски граѓани беа евакуирани од кризните региони во Израел, од кои дел со чартер лет на 13 октомври се вратија дома, по ескалацијата на ситуацијата во Појасот Газа и постојаните ракетни напади. Дел од македонските државјани, сепак, се одлучија да останат во Тел Авив.