ThyssenKrupp shkurton 5000 vende pune

Dega e prodhimit të çelikut në koncernin industrial ThyssenKrupp në Gjermani prezantoi një koncept për të ardhmen, me të cilin menaxhmenti synon të dalë nga kriza ekonomike që ka përfshirë edhe këtë kompani, e cila po përballet me sfida të mëdha.

Sipas njoftimit, kompania do të reagojë ndaj ndryshimeve strukturore gjithnjë e më të thella në tregun evropian të çelikut, si dhe në tregje të tjera. Kapacitetet e tepërta dhe importet e lira, veçanërisht nga Azia, cilësohen si faktorët kryesorë për rritjen e ndjeshme të konkurrencës.

Reduktimi i numrit të vendeve të punës dhe kapaciteteve

Menaxhmenti planifikon t'i zgjidhë këto probleme duke ulur kapacitetin e prodhimit nga 11.5 milionë tonë në vit në 8.7 deri në 9 milionë tonë. Kjo bëhet në mënyrë që kompania të përshtatet me pritshmëritë e tregut në të ardhmen.

Është planifikuar edhe një ulje e ndjeshme e numrit të vendeve të punës, që është pritur shumë keq nga punëtorët dhe sindikatat. Sipas planeve, pritet shkurtimi i rreth 5000 vendeve të punës deri në vitin 2030. Ndërsa 6000 vende të tjera pune duhet të transferohen te ofruesit e jashtëm të shërbimeve ose do të reduktohen përmes shitjes së bizneseve, thuhet në njoftim. Përveç kësaj, është planifikuar mbyllja e fabrikës së përpunimit të çelikut në Kreuztal-Aichen. Në këtë fabrikë janë paraqitur edhe planet për shkurtime, ndërsa punëtorët kanë protestuar.

Sfidat strukturore

ThyssenKrupp është një nga kompanitë më të mëdha të këtij lloji në Evropë me një histori që daton në shekullin e 19-të. Ajo është e njohur për risitë në prodhimin e çelikut, pajisjet industriale, ashensorët dhe projektet inxhinierike. Por vitet e fundit është përballur me vështirësi financiare, probleme strukturore dhe ndryshime në tregun global.

Një nga problemet kryesore të shqetësimit është joefikasiteti strukturor. ThyssenKrupp operon në një gamë të gjerë industrish, gjë që shpesh çon në mbivendosje të funksioneve, kosto të larta operative dhe mungesë fokusi në segmentet kryesore. Veçanërisht problematike janë sektorët e prodhimit të çelikut dhe pajisjeve industriale, të cilat janë të ngarkuara nga kostot e larta fikse dhe konkurrenca në rritje nga Kina, ku prodhuesit mund të ofrojnë çmime më të ulëta.

Përveç kësaj, koncerni ka probleme edhe në sektorin e digjittalizimit dhe modernizimit të prodhimit, që vështirëson përshtatjen me standardet e reja industriale. Këto probleme rezultuan me rënien e rentabilitetit në disa segmente të biznesit, e kjo ndikon edhe në zvoglimin e aftësisë konkurruese në tregun botëror.

Problemet financiare

Niveli i lartë i borxhit dhe performanca e dobët në sektorët kyç krijoi presion mbi menaxhmentin për të marrë masa urgjente. Pavarësisht disa tentativave për të shitur pjesë të biznesit, si dega ei ashensorëve, i cili ishte një nga segmentet më fitimprurëse, paratë e marra nga shitja nuk mjaftuan për stabilizim afatgjatë. Por ka dhe probleme të tjera në furnizimin me lëndë të para, që rritë kostot operative.Të gjitha këto ndërlikuan edhe më tej situatën për ThyssenKrupp, veçanërisht në segmentin e prodhimit të çelikut.

Konsumatorët dhe ligjvënësit po kërkojnë gjithnjë e më shumë procese pune promjedisore, gjë që kërkon investime të mëdha në teknologjitë e gjelbra. Edhe pse kompania ka filluar të investojë në zhvillimin e çelikut të prodhuar me emetim të ulët të dioksidit të karbonit, kjo është shoqëruar me kosto të larta.

Ndaj masat e shpallura nga menaxhmenti janë një përpjekje për të zbatuar ristrukturimin e koncernit dhe për ta vënë atë në një themel të shëndoshë, thonë drejtuesit. Por këto masa parashikojnë edhe shkurtime të vendeve të punës, e kjo po shkakton mllef dhe pakënaqësi të mëdha.