الشباب کا اعلیٰ کمانڈر ہلاک

ایک عینی شاہد احمد داؤد نے خبررساں اداروں کو بتایا ہے کہ جمعہ کی رات داؤد علی حسن کو کسمایو میں اس وقت گولیاں مار کر ہلاک کیا گیا جب وہ مسجد سے واپس اپنے گھر جا رہے تھے۔ اطلاعات کے مطابق نقاب پوش تین نامعلوم افراد نے اچانک ہی ان کے سراور سینے میں گولیوں کی بارش کردی، جس کے نتیجے میں وہ موقع پر ہی ہلاک ہو گئے۔

جنگجو گروپ الشباب کے اس اعلیٰ رہنما کو اسی علاقے میں ہلاک کیا گیا ہے جہاں ان کا مکمل کنٹرول تھا۔ الشباب کے حکام نے کہا ہے کہ اس قتل کے بعد فوری طور پر کئی گرفتاریاں عمل میں لائی گئی ہیں۔ الشباب کے ترجمان شیخ ابوبکرعلی عدن نے کہا ہے کہ اس قتل کے ذمہ داران کو جلد ہی عدالت میں پیش کیا جائے گا۔

شیخ حسن کینیا کی سرحد سے ملحقہ ڈھوبلے نامی علاقے میں الشباب کے سربراہ تھے۔ اسی علاقے میں موجود سرگرم عمل ’حزب اسلام‘ اور دیگر متحارب جنگجو گروہوں نے اس قتل کی واردات پر ابھی تک کوئی تبصرہ نہیں کیا۔

امریکی اسٹیٹ ڈیپارٹمنٹ کے مطابق صومالیہ کے اس جنگجو باغی گروہ کے القاعدہ کے ساتھ قریبی تعلقات ہیں۔ خیال رہے کہ سن 1991 ء کے بعد سے صومالیہ میں کوئی مؤثر حکومت قائم نہیں ہوسکی ہے۔ قرن افریقہ کے اس ملک میں مختلف جنگجو گروپ اقتدار کی خاطر آپس میں ہی لڑرہے ہیں۔

رپورٹ: عاطف بلوچ

ادارت: عابد حسین