امریکا میں متعدد ہلاکتوں کا باعث بننے والا گردن توڑ بخار

امریکا میں گردن توڑ بخار سے ہلاک ہونے والے افراد کی تعداد  14ہو گئی ہے۔ امریکی حکام کے مطابق 10 ریاستوں میں گردن توڑ بخار کی اس وبا سے متاثر 119 سے زائد افراد کے اس مرض کا شکار ہونے کی باقاعدہ تصدیق ہوگئی ہے، جوایک ناقص انجیکشن سے پھیلی ہے۔ یہ انجیکشن کم از کم 14 ہزار افراد کو لگایا گیا تھا۔ بیماری سے سب سے زیادہ متاثرہ ریاست ٹینیسی ہے جہاں 39 کیسز سامنے آئے ہیں، مشی گن میں 25 اور ورجینیا میں 24 افرادگردن توڑ بخارمیں مبتلا ہیں۔

یہ آلودہ اسٹیروئڈ انجیکشن میساچوسیٹس کی ایک کاؤنٹی فارمنگھم میں قائم نیوانگلینڈ کمپاؤنڈنگ سینٹر NECC نامی دوا ساز کمپنی نے تیار کیے ہیں۔ گردن توڑ بخار کی وجہ بننے والے اس اسٹیروئڈ انجیکشن نے صحت عامہ سے متعلق امریکی اداروں کے ساتھ ساتھ فیڈرل اور اسٹیٹ سکیورٹی اداروں کو بھی مجرمانہ نوعیت کے الزامات کے تحت تفتیش پر مجبور کر دیا ہے۔ امریکا میں ہر سطح پر اسٹیروئڈ انجیکشن کا اسکینڈل زیر بحث ہے، جو مختلف بیماریوں کے علاج کے طور پر استعمال کیا جاتا ہے۔ اس آلودہ انجیکشن کا شکار ہونے والی پہلی مریضہ Barbe Puro جنہوں نے نیو انگلینڈ کمپاؤنڈنگ سینٹر نامی ادویات ساز کمپنی پر مقدمہ کر دیا ہے، ان کا تعلق ریاست منیسوٹا سے ہے۔ انہوں بتایا کہ ناقص ٹیکے نے انہیں جسمانی، روحانی اور جذباتی نقصان پہنچایا ہے۔ انہیں یہ انجیکشن 17 ستمبر کو لگایا گیا تھا۔

اُدھر اس آلودہ انجیکشن کا اسکینڈل منظر عام پر آنے کے بعد  سے اسے تیار کرنے والی کمپنی نیو انگلینڈ کمپاؤنڈنگ سینٹر پر برہم صارفین اور متاثرین کی ای میلز اور ٹیلی فون کالز کی بوچھاڑ شروع ہو گئی ہے تاہم اس کمپنی کی طرف سے کوئی فوری رد عمل سامنے نہیں آیا ہے۔

NECC ایک چھوٹے ادارے کے ساتھ کام کرتی ہے اور ادویات بنانے والی یہ فرم امریکا کی خوراک اور ادویات سے متعلق ریگولیشن انتظامیہ کی زیر نگرانی کام نہیں کرتی۔

ریاست میساچوسیٹس کی اٹارنی جنرل مارتھا کوئیکلے نے NECC کمپنی کی پیداوار اور سرگرمیوں کے بارے میں تفتیش کے احکامات جاری کر دیے ہیں۔ ریاستی انتظامیہ کے اہلکاروں نے اس طرف اشارہ کیا ہے کہ مبینہ طور پرآلودہ اسٹیروئڈ انجیکشن بنانے والی فرم نے ادویات کی لائسنسنگ کے قوانین کی خلاف ورزی کی ہے۔

ماہرین کا کہنا ہے کہ فارمیسیز کی طرف سے کمپاؤنڈ ادویات بنانے کے لیے واضح احکامات موجود ہیں۔ ادویات یا ٹیکے وغیرہ ڈاکٹروں کے مشورے اور انفرادی مریضوں کی صحت کی صورتحال مد نظر رکھتے ہوئے تیار کیے جانے چاہییں۔

ریاست میساچوسیٹس میں اٹارنی جنرل کے دفتر کے ایک ترجمان نے کہا، ’ہم وفاقی اور ریاستی انتظامیہ کے ساتھ مسلسل رابطے میں ہیں اور ضروری تفتیش کی جا رہی ہے۔ ایک بار اس طرز عمل کا اور جن حالات میں یہ انجیکشن دیے گئے، ان کا ہمیں پتہ چل جائے، تو پھر ہم مناسب قانونی چارہ جوئی کریں گے‘۔

km/mm (Reuters)