بھارت چین کشیدگی: وزیر اعظم مودی کا سرحدی علاقے کا دورہ

وزیر اعظم مودی کا یہ دورہ ایسے وقت میں کر رہے ہیں جب چینی فوجیوں کے ساتھ جھڑپ میں بھارت کے بیس فوجیوں کی ہلاکت اور سرحد پر جاری تعطل کو دور کرنے کے لیے دونوں ملکوں کے درمیان سفارتی اور فوجی سطح پر بات چیت کا سلسلہ جاری ہے۔ دوسری طرف بھارت میں اپوزیشن جماعتیں چین کے خلاف حکومت کی طرف سے نرم رویہ اپنانے پر وزیراعظم نریندرمودی کی مسلسل نکتہ چینی کر رہی ہیں۔

تجزیہ کاروں کا کہنا ہے کہ وزیراعظم مودی کے اس دورے کا مقصد جہاں بھارتی فوجیوں کا حوصلہ بڑھانا ہے وہیں چین کو یہ واضح پیغام بھی دینا ہے کہ بھارت ہر طرح کی صورت حال کا مقابلہ کرنے کے لیے تیار ہے اور اپنے موقف سے پیچھے نہیں ہٹے گا۔

گوکہ طے شدہ پروگرام کے مطابق بھارتی وزیر دفاع راج ناتھ سنگھ اور آرمی چیف جنرل ایم ایم نروانے کو جمعہ کے روز لداخ کا دورہ کرنا تھا تاہم ان کا دورہ ملتوی کرکے انتہائی رازداری کے ساتھ وزیر اعظم کے دورے کا پروگرام بنایا گیا۔  ذرائع کے مطابق قومی سلامتی کے مشیر اجیت ڈوبھال نے جمعرات کی رات دیر گئے پروگرام کو حتمی شکل دی۔  جس کے بعد وزیر اعظم مودی، چیف آف ڈیفنس اسٹاف جنرل بپن راوت اورآرمی چیف جنرل منوج مکند نروانے کے ساتھ آج صبح نوبجے کے قریب لیہہ میں سرحدی علاقے میں واقع ایک فوجی اڈے پر پہنچ گئے۔

وزیراعظم کے دفتر (پی ایم او) کی طرف سے جاری ایک بیان میں کہا گیا کہ ”وزیر اعظم اس وقت سرحدی علاقے میں نیمو کے فوجی کیمپ میں ہیں۔ وہ صبح یہاں پہنچے تھے۔ انہوں نے آرمی، ایئر فورس اور نیم فوجی دستے انڈو تبتن بارڈر پولیس کے اہلکاروں کے ساتھ تبادلہ خیال کیا۔ نیمو گیارہ ہزار کی فٹ کی بلندی پر سندھ ندی کے کنارے اور زنسکار رینج سے گھرے ہوئے ناقابل رسائی علاقے میں واقع ہے۔"

ناردرن کمان کے آرمی کمانڈر لفٹننٹ جنرل وائی کے جوشی اور چودہویں کور کے کمانڈر لفٹننٹ جنرل ہریندر سنگھ نے وزیر اعظم مودی کو لداخ اور بالخصوص گلوان وادی کی تازہ ترین صورت حال کے بارے میں بریف کیا۔

یہ امر قابل ذکر ہے کہ وزیر اعظم مودی نے گزشتہ اتوار کو ریڈیو پر اپنی ماہانہ تقریر ’من کی بات‘ میں کہا تھا ”لداخ کی زمین پر آنکھ دکھانے والوں کو صحیح جواب دیا گیا ہے۔ اگر بھارت کو دوستی نبھانی آتی ہے تو اسے ایسے موقعوں پر صحیح جواب بھی دینا آتا ہے۔ ہمارے بہادر جوانوں نے یہ ثابت کردیا ہے کہ وہ کسی کو بھی بھارت ماتا کی آن پر آنچ نہیں ڈالنے دیں گے۔"

وزیر اعظم مودی کے آج کے دورے سے قبل گزشتہ 23 اور 24 جون کو بھارتی آرمی چیف جنرل نروانے نے لداخ میں آرمی کے سینیئر افسران کے ساتھ کئی میٹنگیں کی تھیں اور مشرقی لداخ کے مختلف سرحدی علاقوں کا دورہ کیا تھا۔ جب کہ گلوان وادی میں 15جون کو چینی اور بھارتی فوجیوں کے درمیان جھڑپ کے فوراً بعد بھارتی فضائیہ کے سربراہ ایئر چیف مارشل آر کے ایس بھدوریا نے لیہہ اور سری نگر میں سرحدی علاقوں کا دورہ کیا تھا۔

ذرائع کے مطابق مشرقی لداخ اور گلوان وادی میں حقیقی کنٹرول لائن (ایل اے سی)پر دونوں ملکوں کے فوجیوں کی تعداد میں مسلسل اضافہ ہورہا ہے۔ بھارتی میڈیا کے مطابق چینی فوجی اب بھی بھارت کے کئی علاقوں میں موجود ہیں۔ انہوں نے ان علاقوں میں خیمے نصب کرلیے ہیں۔ بھارت کا مطالبہ ہے کہ چین ایل اے سی کی سابقہ پوزیشن بحال کرے۔ اس سلسلے میں دونوں ملکوں کے درمیان فوجی اورسفارتی دونو ں سطحوں پر بات چیت بھی ہورہی ہے۔

اس دوران امریکی صدر ڈونلڈ ٹرمپ نے بھارت چین سرحد ی کشیدگی کا ذمہ دار  چینی جارحیت کو ٹھہرایا ہے۔ وائٹ ہاؤس کی پریس سکریٹری کیلی میکنزی نے امریکی صدر کے حوالے سے کہا ”بھارت کے ساتھ سرحد پر چین کی جارحیت چین کے وسیع تر پیٹرن کا حصہ ہے۔ چین کی یہ جارحیت صرف بھارت کے ساتھ محدود نہیں ہے۔“