حسنی مبارک کے بعد مصر کا مستقبل روشن نظر آ رہا ہے: امرموسیٰ

جرمن چانسلر انگیلا میرکل نے مشرق وسطیٰ میں جاری تمام جمہوریت پسند تحریکوں کے ساتھ یکجہتی کا اظہار کیا ہے۔ ساتھ ہی میرکل نے مشرق وسطیٰ کے خطے میں اقتصادی ترقی پر بھی زور دیا ہے۔ جرمن چانسلر نے گزشتہ روز برلن میں عرب لیگ کے سیکرٹری جنرل امر موسٰی کے ساتھ ملاقات کی۔ اس موقع پر میرکل نے کہا: ’’مشرق وسطیٰ کے خطے میں پُر امن اور جمہوری ترقی کا دار ومدار اس امر پر ہے کہ وہاں کے عوام معاشی طور پر بہتر زندگی گزار سکیں۔‘‘ میرکل نے مزید کہا کہ خوشحالی ہر اُس ملک میں آ سکتی ہے جو اس کے لیے کوششں کرے۔ میرکل نے امر موسٰی کے ساتھ دو طرفہ دلچسپی کے امور پر تبادلہ خیال کے علاوہ گزشتہ چند ماہ کے دوران مصر، تیونس، لیبیا اور شام میں آنے والی تبدیلیوں کے بارے میں بھی بات چیت کی۔ میرکل کا کہنا تھا کہ اگراس امر کو مد نظر رکھا جائے کہ عرب دنیا کی آبادی کتنی جوان ہے، تو پھر ہمیں اندازہ ہوتا ہے کہ ہمیں کن چیلنجز کا سامنا ہے اور یہ کہ یورپی ریاستوں کے ساتھ عرب ممالک کے تعاون اور اشتراک عمل سے کیا توقعات وابستہ کی جا سکتی ہیں۔

عرب لیگ کے سیکرٹری جنرل نے جرمن دارالحکومت میں چانسلر میرکل سے ملاقات کے موقع پر عرب معاشروں میں جمہوریت کے نفاذ اور جمہوریت پسند عناصر کی جد وجہد کے لیے پورپی حمایت کا خیر مقدم کیا۔ انہوں نے کہا کہ یورپ کی طرف سے یہ حمایت ایک ایسے وقت میں کی جا رہی ہے جب عرب دنیا ایک نازک دور سے گزر رہی ہے۔ امر موسٰی نے کہا: ’’ ہم وقت کا مقابلہ کر رہے ہیں اور ان حالات میں یورپ، جرمنی اور تمام دنیا کی طرف سے ہمیں جو حمایت مل رہی ہے ہم اُس کے لیے بہت شکر گزار ہیں۔‘‘ امر موسٰی کا مزید کہنا تھا کہ عرب ممالک میں ہر کوئی جمہوریت، بہتر اقتصادی صورتحال اور زیادہ سے زیادہ سکیورٹی کا خواہاں ہے۔ یہی عرب ممالک کے عوام چاہتے ہیں اور انہی مقاصد کے حصول کے لیے عرب لیگ کام کر رہی ہے۔ امر موسٰی کا کہنا تھا: ’’ مُجھے امید ہے کہ ہم کامیاب ہوں گے۔‘‘

عرب لیگ کے سیکرٹری جنرل اور سابق مصری وزیر خارجہ امر موسٰی نے خاص طور سے مصر کی صورتحال کو امید افزا قرار دیا۔ انہوں نے کہا کہ حسنی مبارک کے دور اقتدار کے خاتمے کے بعد مصر کا مستقبل روشن نظر آ رہا ہے۔ انہوں نے کہا کہ مبارک کی اقتدار سے علیحدگی اس امر کا ثبوت ہے کہ مصری عوام نے وہ کچھ حاصل کر لیا جس کی وہ جدو جہد کر رہے تھے۔

رپورٹ: کشور مصطفٰی

ادارت: افسر اعوان