صدر اشرف غنی کی پیشکش کی کبھی حمایت نہیں کریں گے، طالبان

افغان صدر نے ابھی تک اپنی تجویز سے متعلق کوئی تفصیلات نہیں بیان کی ہیں تاہم کابل میں دو سرکاری عہدیداروں نے کہا ہے کہ اشرف غنی آئندہ ماہ ترکی میں تمام اسٹیک ہولڈرز کی کانفرنس کے موقع پر اپنے الیکشن پلان کا اعلان کریں گے۔

خبر رساں ادارے اے ایف پی کو ایک بیان دیتے ہوئے ایک افغان سینیئر حکومتی اہلکار نے کہا، ''حکومت اپریل میں ترکی میں ہونے والی کانفرنس میں افغانستان میں قبل از وقت انتخابات کے اپنے نئے منصوبے کے ساتھ شرکت کرے گی، جو افغانستان کے مستقبل کے لیے ایک منصفانہ پلان ہے۔‘‘

’دوحہ کانفرنس‘ جائز مطالبات سے آگاہ کرنے کا موقع ہے، طالبان

طالبان کا موقف

افغان صدر اشرف غنی کی رواں سال کے آخر میں انتخابات کروانے کی تجویز کو طالبان نے فوری طور سے مسترد کر دیا ہے۔ اس بارے میں طالبان کے ترجمان ذبیح اللہ مجاہد کا کہنا تھا، '' اس طرح کے اقدامات اور انتخابات نے ماضی میں بھی افغانستان کو بحران کے دہانے پر پہنچا دیا تھا۔‘‘

طالبان کے ترجمان نے خبر رساں ایجنسی اے ایف پی سے بات چیت کرتے ہوئے مزید کہا، ''وہ اب ایک ایسے عمل کے بارے میں بات کر رہے ہیں، جو ہمیشہ ہی سے اسکینڈلز سے بھرپور رہا ہے۔‘‘ ذبیح اللہ مجاہد کا کہنا تھا کہ ملک کے مستقبل کے بارے میں کوئی بھی فیصلہ فریقین کے مابین جاری مذاکرات کے  ذریعے ہم آہنگ بنانا لازمی ہے، ''ہم اس کی حمایت کبھی نہیں کریں گے۔‘‘

قطر ميں اجلاس، موسمياتی تبديلياں زير بحث

 

امریکی مخالفت

گزشتہ برس امریکا اور طالبان کے درمیان طے پانے والی امن ڈیل کے مطابق واشنگٹن کو اس سال یکم مئی تک افغانستان میں موجود اپنے آخری فوجی واپس بلانا ہوں گے۔ جبکہ نئے امریکی صدر جو بائیڈن نے رواں ماہ کے شروع میں کہا تھا، '' اس  ڈیڈ لائن کے اندر اندر فوجی انخلاء کا عمل مکمل کرنا بہت کٹھن ہو گا۔‘‘

اس معاہدے نے طالبان اور افغان حکومت کے لیے بھی ایک امن منصوبے پر بات چیت کرنے کی راہ ہموار کی تھی تاکہ معاہدے کے ذریعے یہ فیصلہ کیا جا سکے کہ اس ملک پر کس طرح حکمرانی کی جانی چاہیے؟ لیکن قطری دارالحکومت دوحہ میں ستمبر کے بعد سے ہونے والے ان مذاکرات میں بہت کم پیش رفت ہو پائی ہے۔

افغانستان کے الیکشن کی پیچیدہ تاریخ

افغانستان میں الیکشن ہمیشہ سے ایک بہت گھمبیر عمل رہا ہے۔ انتخابات کی راہ میں بہت سارے مسائل آڑے آتے ہیں۔ جنگ سے تباہ حال اس ملک میں انتخابات دھوکا دہی، بہت کم ووٹرز ٹرن آؤٹ اور شورش پسندوں کے لیے تشدد پھیلانے کا ایک اور موقع ثابت ہوتے ہیں۔

اب امریکا، روس اور دیگر اسٹیک ہولڈرز چاہتے ہیں کہ افغانستان میں کسی نا کسی شکل میں ایک عبوری حکومت تشکیل پا جائے۔ لیکن موجودہ صدر اشرف غنی کا اصرار ہے کہ 'قائدین کا انتخاب‘ صرف بیلٹ باکس کے ذریعے ہی کیا جائے۔

مقررہ تاریخ تک فوج کا افغانستان سے انخلاء ’مشکل‘، بائیڈن

 

امریکی افواج کے انخلاء کا معاملہ

طالبان کی جانب سے افغان صدر کی پیش کش کا فوری رد عمل ایک ایسے وقت پر سامنے آیا ہے، جب امریکی وزیر خارجہ اینتھونی بلنکن نے برسلز میں مغربی دفاعی اتحاد نیٹو کے اپنے پہلے دورے کے دوران اتحادی لیڈروں سے مذاکرات میں بتایا کہ واشنگٹن ابھی اس معاملے میں ناپ تول کر رہا ہے کہ آیا یکم مئی کی ڈیڈ لائن تک وہ اپنی باقی ماندہ فورسز افغانستان سے واپس بلا لے یا نہیں۔

 اُدھر کابل حکومت ملک میں امریکی فورسز کو جب تک ممکن ہو سکے تعینات رکھنا چاہتی ہے اور اس کے لیے اس کے پاس سب سے بڑی دلیل یا جواز یہ ہے کہ گزشتہ چند مہینوں سے یہ ملک پھر سے بڑھتے ہوئے تشدد کی لپیٹ میں ہے۔

طالبان کو افغانستان کے میدان جنگ میں بہت زیادہ فوائد کے حصول کے بعد اب مذکورہ اسٹریٹیجی میں سے کسی ایک سے بھی اپنے فائدے کے حصول کی امید نہیں ہے۔ طالبان کے نائب سربراہ ملا عبدالغنی برادر نے گزشتہ ہفتے ماسکو کی ایک کانفرنس میں کہا تھا، ''افغانوں کو اپنی قسمت کا فیصلہ خود کرنے کے لیے چھوڑ دیا جائے۔‘‘

ک م/ا ا ( اے ایف پی، روئٹرز)