متضاد مقاصد امریکا کی نئی مشرق وسطیٰ پالیسی کو مشکل تر بنانے کا سبب

امریکی وزیر خارجہ جان کیری نے گزشتہ دو روز کے دوران بحران زدہ عرب ریاست عراق کا دورہ کیا۔ اس سے پہلے بھی وہ گزشتہ چند ماہ کے دوران مشرق وسطیٰ کے متعدد دورے کر چُکے ہیں۔ جان کیری کا بار بار مشرق وسطیٰ کا دورہ کرنا اس امر کی نشاندہی کرتا ہے کہ امریکا ماضی کی طرح اب بھی سیاسی اور مذہبی دونوں اعتبار سے بُری طرح سے منتشر اس خطے میں اپنے کردار کو اہم سمجھتے ہوئے اُس کے معاملات میں پوری طرح ملوث رہنے کو اپنی ذمہ داری سمجھتا ہے۔

ماہرین، صحافیوں اور ابلاغ عامہ کے خیال میں دنیا کی تمام بڑی طاقتوں کی خارجہ پالیسی کے معاملات میں ان کی حکومتیں سب سے پہلے دنیا کے مختلف مذاہب کے ساتھ اپنے سلوک اور روابط سے متعلق وسیع منصوبہ تیار کرتی ہیں۔ سابق امریکی صدر ’جارج بُش سینیئر‘ نے اس کے لیے ’ویژن تھنگ‘ یا ’تصور‘ کی اصطلاح استعمال کی تھی۔ اور اگر سیاستدانوں سے اس عمل میں کہیں کوئی کوتاہی ہو جائے تو اس کی تلافی انہیں میڈیا اور ووٹروں کے ذریعے کرنا پڑتی ہے۔ اس قسم کی حکمت عملی جس کا زور و شور سے مطالبہ کیا جاتا ہے اس لیے نہایت مشکل ہوتی ہے کیونکہ مشرق وسطیٰ جیسے کثیر الجہتی خطے کے لیے خارجہ پالیسی سے متعلق حکمت عملی کو سہل اور مختصر خلاصے کی صورت میں پیش کرنا گویا کوزے میں دریا کو سمونے کی کوشش کرنا ہے۔

موجودہ امریکی حکومت صدر باراک اوباما کی جون 2009 ء میں قاہرہ میں کی جانے والی مشہور زمانہ تقریر کے گیت گا سکتی ہے۔ جس کا عنوان تھا، ’’ایک نئی ابتداء۔‘‘ اوباما کی تقریر کے مرکزی نکات عالم اسلام اور مغرب کے مابین بہتر تعلقات کا فروغ، اسرائیل اور فلسطین کے مابین امن و مفاہمت اور انتہا پسندی کے خلاف جنگ تھا۔ پانچ سال بعد بے رحم حقائق سامنے آئے اور اوباما نے قاہرہ کی تقریر میں مشرق وسطیٰ پالیسی کے حوالے سے جو حکمت عملی پیش کی تھی اُسے کاری ضرب لگی ہے۔

گمراہ کُن حکمت عملی

عراق میں بُش حکومت کی مداخلت کے بعد سے مشرق وسطیٰ سے متعلق کوئی حتمی حکمت عملی نہیں پائی جاتی ہے۔ یہ کہنا ہے امریکن یونیورسٹی آف پیرس کے بین الاقوامی سیاست کے پروفیسر ’ہال گارڈنر‘ کا۔ وہ اوباما کی، اسرائیل اور فلسطین کے مابین امن مذاکرات کے عمل میں دوبارہ سے روح پھونکنے کی ماضی کی اور حالیہ کوششوں کو مشرق وسطیٰ پالیسی کی حکمت عملی کی بنیاد قرار دیتے ہیں۔ گارڈنر کہتے ہیں،’’ اوباما کی سربراہی میں واشنگٹن حکومت نے اپنا ایک اہم مقصد بنا کر اسرائیل اور فلسطین کو قریب لانے کی کم از کم کوشش تو کی۔‘‘

جس طرح بہت سے افراد اوباما کی مشرق وسطیٰ میں امن کی بحالی کی کوششوں کی ناکامی کے اندازے لگا رہے تھے اُسی طرح پروفیسر گارڈنرکا بھی یہ کہنا ہے کہ مشرق وسطیٰ امن پیش قدمی ناکام ہے اور اس کے منفی اثرات تمام خطے پر پڑے ہیں۔

ایک وسیع منصوبہ ناممکن ہے

دی ہیگ میں قائم ہالینڈ کے بین الاقوامی تعلقات کے انسٹیٹوٹ سے منسلک ایک ماہر فان وین کے مطابق اوباما کی قاہرہ کی تقریر میں مشرق وسطیٰ کے امن کے بارے میں کچھ بھی کہا گیا ہو، یہ امر نظر انداز نہیں کیا جا سکتا کہ اس خطے میں جو قومی، نسلی اور مذہبی مرکب پایا جاتا ہے وہ وہاں ایک متحدہ حکمت عملی پر عمل درآمد کی راہ میں سب سے بڑی رکاوٹ ہے۔

فان وین کہتے ہیں،’’میں سمجھتا ہوں کہ یہ ناممکن ہے۔ امریکا نے مشرق وسطیٰ سے متعلق اپنی پالیسی میں چند نہایت واضح اہداف طے کر رکھے ہیں تاہم واشنگٹن کا مسئلہ ان اہداف کو ایک دوسرے کے ساتھ ہم آہنگ اور مربوط بنانا ہے۔‘‘