مے کی میرکل سے ہنگامی ملاقات، بریگزٹ پر صلاح و مشورے

جرمن چانسلر انگیلا میرکل نے آج منگل کو برطانوی وزیر اعظم ٹریزا مے کے ساتھ تقریباً ایک گھنٹے تک ملاقات کی۔ اس دوران دونوں رہنماؤں نے یورپی یونین سے برطانوی انخلاء کے موضوع پر جاری پیچیدہ بریگزٹ بحث پر صلاح و مشورے کیے۔ میرکل نے مقامی وقت کے مطابق دوپہر ایک بجے چانسلر دفتر میں مے کا استقبال کیا۔ تاہم اس دوران ہونے والی بات چیت کی تفصیلات عام نہیں کی گئی ہیں۔

یورپی حکام یہ واضح کر چکے ہیں کہ ان کی جانب سے برطانیہ کو اس معاملے میں بہترین شرائط دی گئی ہیں تاکہ اسے کابینہ سے بریگزٹ معاہدے کو منظور کروانے میں کوئی پریشانی نہ ہو۔

برطانوی پارلیمان میں بریگزٹ ڈیل پر ووٹنگ مؤخر کرنے کے بعد مے کے دورہ یورپ کو اہم قرار دیا جا رہا ہے۔

برطانوی پارلیمان میں وزیرا عظم ٹریزا مے کے بریگزٹ پلان پر رائے شماری اکیس جنوری سے قبل کر لی جائے گی۔ برطانوی وزیر اعظم کے ایک ترجمان نے منگل کے دن بتایا کہ رائے شماری کے اس عمل سے قبل وہ اپنے یورپی ساتھیوں کی اضافی حمایت حاصل کرنا چاہتی ہیں۔

 

ابھی تک یورپی یونین برطانیہ کے ساتھ بریگزٹ کے موضوع پر نئے مذاکراتی عمل کو مسترد کر رہی ہے۔ تاہم مے کی خاص طور پر کوشش ہے کہ آئرلینڈ اور شمالی آئرلینڈ کی مشترکہ سرحد کے حوالے سے مزید رعایت حاصل کر لی جائے۔

برطانوی وزیر اعظم نے جرمنی پہنچنے سے قبل ہالینڈ میں ڈچ وزیر اعظم مارک رٹے سے بھی ملاقات کی تھی۔ وہ یورپی کونسل کے سربراہ ڈونلڈ ٹسک سے ملنے کے بعد واپس لندن روانہ ہو گئیں۔ اس موقع پر انہوں نے یورپی کمیشن کے سربراہ ژان کلود ینکر سے بھی بریگزٹ معاہدے پر بات چیت کی۔ ہالینڈ، جرمنی اور برسلز میں اپنی ملاقاتوں کے بعد مے بدھ کو اپنی کابینہ سے ایک خصوصی ملاقات بھی کریں گی۔

تقریباً ڈھائی سال قبل برطانیہ میں بریگزٹ ریفرنڈم کا نتیجہ برلن کے لیے بھی ایک بڑے جھٹکے سے کم نہیں تھا۔ جرمن سیاسی حلقوں میں سے بہت کم ہی کو اس نتیجے کی امید تھی اور تقریباً کوئی بھی جرمن شہری یہ نہیں چاہتا تھا کہ برطانیہ یورپی یونین سے الگ ہو۔