وزیر اعظم لز ٹرس کا صرف چھ ہفتے بعد ہی استعفے کا اعلان

لز ٹرس نے جمعرات بیس اکتوبر کے روز لندن میں دس ڈاؤننگ سٹریٹ پر واقع اپنی سرکاری رہائش گاہ کے باہر صحافیوں کے ساتھ بات چیت میں اعلان کیا کہ وہ آئندہ ہفتے سربراہ حکومت کے طور پر اپنی ذمے داریوں سے دستبردار ہو جائیں گی۔

لز ٹرس کا برطانوی سفارت خانہ یروشلم منتقل کرنے پر غور

انہوں نے کہا کہ وزیر اعظم بننے سے قبل حکمران ٹوری پارٹی کی سربراہ کے طور پر اپنے انتخاب سے پہلے انہوں نے عوام سے جو وعدے کیے تھے، وہ اب ان وعدوں کو پورا کرنے کے قابل نہیں رہیں۔ ٹرس نے اس کی وجہ یہ بتائی کہ وہ اپنی پارٹی کی اس حمایت اور اعتماد سے محروم ہو گئی ہیں، جس کا ان کی ذات پر اظہار ان کے پارٹی لیڈر کے طور پر انتخاب کے وقت کیا گیا تھا۔

لز ٹرس نے صحافیوں کو بتایا کہ ان کی جانشین قیادت کے طور پر نئے ٹوری پارٹی لیڈر کا انتخاب اگلے ہفتے تک مکمل ہو جائے گا، جس کے بعد وہ اپنی حکومتی ذمے داریوں سے مستعفی ہو جائیں گی۔

برطانوی تاریخ کی سب سے کم عرصے تک اقتدار میں رہنے والی وزیر اعظم

لز ٹرس کے آئندہ دنوں مستعفی ہو جانے کے اعلان کے بعد برطانوی سیاست میں ایک نیا ریکارڈ بھی بن گیا ہے۔ وہ برطانیہ میں سب سے کم عرصے کے لیے اقتدار میں رہنے والی سیاست دان بن گئی ہیں۔

انہیں حکومت سازی کی دعوت آنجہانی برطانوی ملکی الزبتھ ثانی نے دی تھی، جن کا اپنی یہ آئینی ذمے داری پورا کرنے کے ایک دو روز بعد ہی تقریباﹰ چھ ہفتے قبل انتقال ہو گیا تھا۔ یوں لز ٹرس کے لیے بطور سربراہ حکومت ان کی نامزدگی اور آج استعفے کے اعلان کا درمیانی عرصہ صرف تقریباﹰ ڈیڑھ ماہ بنتا ہے۔

برطانیہ: لیسسٹر میں ہندو اور مسلم گروپوں میں جھڑپیں

یہ برطانوی سیاسی تاریخ میں کسی بھی وزیر اعظم کے اقتدار میں رہنے کا مختصر ترین عرصہ ہے۔ لز ٹرس سے پہلے مختصر ترین عرصے تک حکومت کرنے والے برطانوی وزیر اعظم جارج کیننگ تھے، جن کی حکومت چار ماہ سے بھی کم عرصے تک چلی تھی۔

جارج کیننگ کا 1827ء میں اس وقت انتقال ہو گیا تھا، جب انہیں وزیر اعظم بنے صرف 119 دن ہوئے تھے۔

ٹوری پارٹی کی قیادت سے استعفیٰ

برطانیہ میں حکمران جماعت کا سربراہ ہی وزیر اعظم ہوتا ہے اور لز ٹرس نے آج جمعرات کے روز ٹوری پارٹی کی سربراہی سے استعفیٰ دے دیا۔

انہوں نے دس ڈاؤننگ سٹریٹ کے باہر صحافیوں کو بتایا، ''میں نے بادشاہ چارلس کے ساتھ گفتگو میں انہیں اطلاع دے دی ہے کہ میں قدامت پسند جماعت کی سربراہی سے مستعفی ہو رہی ہوں۔‘‘

تاریخ ساز برطانوی ملکہ الزبتھ ثانی کے قائم کردہ بڑے ریکارڈ

 چھ ستمبر کو وزیر اعظم نامزد کی جانے والی لز ٹرس کو گزشتہ چھ ہفتوں کے دوران اپنی حکومت کے وزیر خزانہ اور قریب ترین سیاسی معتمد کوارٹینگ کو برطرف کرنا پڑ گیا تھا اور اس کے بعد ان کی کابینہ میں وزیر داخلہ کے عہدے پر فائز خاتون سیاستدان بھی مستعفی ہو گئی تھیں۔

اسی دوران برطانوی اپوزیشن جماعت لیبر پارٹی کے سربراہ کیئر سٹارمر نے مطالبہ کر دیا ہے کہ ملک میں فوری طور پر قبل از وقت عام انتخابات کرائے جائیں۔ انہوں نے اپنے ایک بیان میں کہا کہ ٹوری پارٹی میں داخلی طور پر جو ٹوٹ پھوٹ اور ناکامیاں دیکھی جا رہی ہیں، ان کے پیش نظر ملک میں نئے عام انتخابات ضروری ہو گئے ہیں۔

م م / ع ا (اے ایف پی، روئٹرز)