پاکستان کو سیریز بچانے کا چیلنج درپیش

پاکستانی کپتان سرفراز احمد نے دبئی اسپورٹس سٹی میں پریس کانفرنس کے دوران اپنی ٹیم میں ایک تبدیلی کا اعلان کیا۔ سرفراز احمد کے مطابق حسن علی زخمی ہیں اور ان کی جگہ وہاب ریاض کو ٹیم میں شامل کیا جا رہا ہے جنہوں نے آخری بار اس سال اپریل میں جمیکا میں ٹیسٹ میچ کھیلا تھا۔ سرفراز احمد نے کہا کہ ابوظبی میں پاکستان صرف آخری دن خراب کھیلنے کی وجہ سے نہ جیت سکا لیکن اس بار وہ کافی پر امید ہیں۔

پاکستان اور سری لنکا کی ٹیموں نے جمعرات کو دبئی اسٹیڈم کی فلڈ لائٹس میں گلابی گیند سے پریکٹس کی۔ سرفراز احمد نے کہا کہ ہم نے صرف اپنی کمزوریوں پر بات کی ہے اور پریکٹس پر بھی دو دن زیادہ سے زیادہ توانانی صرف نہیں کی۔ سرفراز احمد نے پاکستانی بیٹنگ پر اعتماد کا اظہار کرتے ہوئے کہا کہ انہوں نے دوسرے ٹیسٹ میں کھلاڑیوں کو اپنا نیچرل گیم کھیلنے کی تلقین کی ہے۔ ان کا کہنا تھا کہ رنگانا ہیراتھ کے خلاف جارحانہ بیٹنگ کرنا ہوگی۔

پاکستان کی گز شتہ سات برسوں میں متحدہ عرب امارات میں یہ دسویں ٹیسٹ سیریز ہے اور دنیا کی کوئی ٹیم اسے ہرا نہیں سکی لیکن اب اسے سیریز کے ساتھ اس میچ کے دوران اپنی عالمی رینکنگ بچانے کی بھی جنگ لڑنا ہو گی جو جو اب چھ ہو چکی ہے۔ دلچسپ بات یہ ہے دبئی ٹیسٹ جیت کر ساتویں نمبر پر موجود سری لنکا پاکستان کے ساتھ اپنی رینکنگ کا تبادلہ کر سکتا ہے۔

سری لنکن کپتان دنیش چندی مال نے نامہ نگاروں کو بتایا، ’’پاکستان ایک اچھی ٹیم ہے اور ہم پر دبئی میں ضرور حملہ آور ہوگی لیکن ہم صرف اور صرف ٹیسٹ میچ اور سیریز جیتنے کا سوچ رہے ہیں۔‘‘

چندی مال نے کہا کہ پاکستانی بیٹسمین بائیں ہاتھ کی اسپن کو اچھا نہیں کھیلتے اس لیے رنگانا ہیراتھ ان کے لیے ابوظہبی کی طرح پھر خطرہ بن سکتے ہیں جہاں انہوں نے گیارہ کھلاڑی آؤٹ کیے تھے۔ انہوں نے کہا کہ وہ ٹیم میں تبدیلی نہیں چاہتے لیکن تھرمانے ان فٹ ہیں۔

سری لنکا، آسٹریلیا، نیوزی لینڈ، جنوبی افریقہ، پاکستان، ویسٹ انڈیز اور انگلینڈ کے بعد ڈے نائٹ ٹیسٹ کھیلنےو الی دنیا کی ساتویں ٹیم بنے گی۔ اس بارے میں کپتان چندی مال کا کہنا تھا کہ پہلی بار مصنوعی روشنیوں میں ٹیسٹ میچ کھیلنا ان کی ٹیم کے لیے ایک چیلنج ہے لیکن وہ اس پر پورا اترنے کی کوشش کریں گے: ’’ہمارے کھلاڑیوں کو دن میں پنک گیند سے ڈومیسٹک کرکٹ کھیلنے کا تجربہ ہے۔‘‘

دبئی میں ان دنوں موسم سخت گرم ہے اور دن کے وقت درجہ حرارت چالیس ڈگری سینٹی گریڈ تک پہنچ جاتا ہے لیکن پاکستان اور سری لنکا کے درمیان یہ میچ دوپہر دو بجے شروع ہوگا۔ پاکستان نے گز شتہ برس دبئی میں اپنے پہلے ڈے نائٹ ٹیسٹ میں ویسٹ انڈیز کے خلاف اٹھاون رنز سے کامیابی حاصل کی تھی جبکہ اس نوعیت کا دوسرا میچ پاکستان، آسٹریلیا کے ہاتھوں برسبین میں ہار گیا تھا۔

دبئی میں جمعہ کے روز سے شروع ہونے والے میچ میں انگلینڈ کے نائیجل لونگ اور رچرڑ کیٹل برا امپائرنگ کے فرائض انجام دیں گے۔ بھارت کے روی سندرم تیسرے امپائر ہوں گے۔