پولینڈ میں خفیہ امریکی جیل کے خلاف یورپی عدالت کا فیصلہ

وارسا سے موصولہ رپورٹوں کے مطابق فرانس کے شہر اسٹراسبرگ میں قائم انسانی حقوق کی یورپی عدالت نے اپنا یہ فیصلہ آج جمعرات کے روز سنایا۔ فیصلے کے بعد واشنگٹن اور اس کے اتحادی ملکوں پر پہلے سے موجود یہ دباؤ اور زیادہ ہو گیا ہے کہ انہیں اس عالمی پروگرام سے متعلق حقائق منظر عام پر لانے چاہییں جس کا مقصد دہشت گرد نیٹ ورک القاعدہ کے مشتبہ ارکان کو خفیہ طور پر حراست میں رکھنا ہے۔

خبر ایجنسی روئٹرز نے اپنی رپورٹوں میں لکھا ہے کہ امریکا یہ تسلیم کر چکا ہے کہ اس نے نائن الیون کے دہشت گردانہ حملوں کے بعد کے برسوں میں ایک ایسا پروگرام تیار کیا جس کا مقصد مشتبہ دہشت گردوں کو ’غیر معمولی حالات میں قید‘ رکھنا تھا۔ لیکن واشنگٹن نے آج تک یہ راز کبھی ظاہر نہیں کیا کہ ایسی خفیہ جیلیں امریکا کے کون کون سے اتحادی ملکوں میں قائم کی گئیں۔

روئٹرز کے مطابق یورپی عدالت کے خاص طور پر آج کے فیصلے کے بعد امریکا اور اس کے اتحادیوں کے لیے یہ بات زیادہ سے زیادہ مشکل ہوتی جا رہی ہے کہ وہ اس موضوع پر اپنی خاموشی برقرار رکھ سکیں۔ اسٹراسبرگ کی عدالت نے اپنا فیصلہ ایسے وقت پر سنایا ہے جب امریکی سینیٹ کی ایک کمیٹی اسی حوالے سے ایک رپورٹ کے اجراء کی تیاریوں میں مصروف ہے۔ یہ رپورٹ واشنگٹن حکومت ہی کی تیار کردہ ایک ایسی انتہائی اہم خفیہ سرکاری دستاویز کے منتخب حصوں پر مشتمل ہو گی، جو بیرونی ممالک میں امریکا کے خفیہ حراستی مراکز کا احاطہ کرتی ہے۔

انسانی حقوق کی یورپی عدالت نے 24 جولائی کو اپنا فیصلہ ایک ایسے مقدمے میں سنایا جو ایک سعودی نژاد باشندے ابو زبیدہ اور سعودی شہری عبدالرحیم الناشری کی طرف سے دائر کیا گیا تھا۔ درخواست دہندگان کا الزام تھا کہ انہیں نہ صرف پولینڈ کے ایک جنگل میں سی آئی اے کی قائم کردہ ایک جیل میں رکھا گیا تھا بلکہ ان کے ساتھ وہاں ایسا برتاؤ بھی کیا گیا جو ایذا رسانی کے زمرے میں آتا ہے۔

اس وقت یہ دونوں درخواست دہندگان مشتبہ دہشت گردوں کے طور پر کیوبا کے جزیرے پر قائم گوانتانامو کی امریکی جیل میں قید ہیں اور بنیادی طور پر ان کا دائر کردہ مقدمہ یورپی یونین کے رکن ملک پولینڈ کے خلاف تھا۔ اس مقدمے میں وارسا حکومت پر الزام لگایا گیا تھا کہ وہ پولستانی سرزمین پر ان افراد کی غیر قانونی حراست اور ان پر تشدد کو رکوانے میں ناکامی کے علاوہ ان جرائم کے مرتکب افراد کے خلاف قانونی کارروائی کرنے میں بھی ناکام رہی۔

اسٹراسبرگ کی عدالت کے مطابق اپنے ہاں اس خفیہ امریکی جیل کے قیام سے پولینڈ انسانی حقوق کے یورپی کنونشن کی متعدد شقوں کی خلاف ورزیوں کا مرتکب ہوا۔ اس کنونشن کی یہ شقیں تشدد، آزادی کے حق اور جرائم کا شکار بننے والے افراد کی مناسب تلافی جیسے امور کا احاطہ کرتی ہیں۔

عدالت نے اپنے فیصلے میں وارسا حکومت کو یہ حکم بھی دیا کہ وہ زر تلافی کے طور پر درخواست دہندگان میں سے الناشری کو ایک لاکھ یورو اور ابو زبیدہ کو ایک لاکھ تیس ہزار یورو ادا کرے۔

اس عدالتی فیصلے کا اطلاق امریکا پر نہیں ہوتا کیونکہ وہ اس یورپی عدالت کی عملداری سے باہر ہے۔ روئٹرز کے مطابق آج کے فیصلے پر وارسا حکومت کی شرمندگی ایک یقینی سی بات ہے کیونکہ پولینڈ سکیورٹی کے شعبے میں امریکا کا قریبی اتحادی ہے اور پولستانی حکام نے ہمیشہ ہی اس بات کی تردید کی ہے کہ ان کے ملک میں سی آئی اے کی کوئی خفیہ جیل ہے یا کبھی موجود تھی۔

اس عدالتی فیصلے کا ایک پہلو یہ بھی ہے کہ اس کے قانونی اثرات سے ایسی دیگر یورپی ریاستیں بھی متاثر ہو سکتی ہیں، جن پر الزام ہے کہ انہوں نے بھی اپنے ہاں سی آئی اے کو خفیہ جیلیں قائم کرنے کی اجازت دی تھی۔ ان ریاستوں میں سے رومانیہ اور لیتھوانیا کے خلاف تو اسٹراسبرگ کی اسی عدالت میں باقاعدہ مقدمات بھی دائر کیے جا چکے ہیں۔