یہودی لڑکوں کا اغوا، معاملہ سنگین تر ہوتا ہوا

ان فلسطینیوں کو پانچ روز قبل مغربی اُردن کے مقبوضہ علاقے سے تین اسرائیلی لڑکوں کے لاپتہ ہوجانے کے بعد اس الزام کے تحت گرفتار کیا گیا ہے کہ مبینہ طور پر ان فلسطینیوں نے اسرائیلی لڑکوں کو اغوا کیا ہے۔

اسرائیل نے 51 فلسطینیوں کو دوبارہ گرفتار کرنے سے پہلے گزشتہ منگل کو ہی غزہ پٹی میں آباد حماس کے خلاف ایک نئے بڑے آپریشن کی دھمکی دی تھی۔ اسرائیلی ذرائع کے مطابق حماس نے مغربی اُردن کے علاقے سے پانچ روز قبل تین اسرائیلی ٹین ایجرز کو اغوا کر لیا تھا۔ ایک سرکاری بیان میں اس کارروائی کی سخت مذمت کرتے ہوئے کہا گیا ہے کہ اسرائیل ان نو عمر اسرائیلی لڑکوں کی رہائی تک حماس کے خلاف اپنی کارروائیاں ختم نہیں کرے گا۔ کسی نے بھی ان اسرائیلی لڑکوں کے لاپتہ ہونے کی ذمہ داری قبول نہیں کی تاہم اسرائیل نے اس یقین کا اظہار کیا ہے کہ ان لڑکوں کو فلسطینی عسکریت پسند گروپ حماس نے اغوا کیا ہے۔ ایک یہودی مدرسے کے ان طالب علموں کو آخری بار گزشتہ جمعرات کی شام غرب اردن کے ایک علاقے میں لفٹ لے کر سفر کرنے والوں کے ایک اسٹاپ پر دیکھا گیا تھا۔ ان کے لاپتہ ہونے کے بعد سے نہ تو اب تک اُن لڑکوں کی طرف سے اب تک کوئی ایک لفظ سننے کو ملا ہے، نہ عوامی سطح پر کسی کو اس کارروائی کا ذمہ دار ٹھہرایا گیا ہے۔ حماس سمیت کسی نے بھی اب تک اسے اغوا برائے تاوان کا کیس بنا کر تاوان کا مطالبہ نہیں کیا ہے اور حماس نے اس کارروائی میں ملوث ہونے کے الزام کو رد کیا ہے۔

اسرائیل کے ایک فوجی ترجمان لیفٹیننٹ کرنل پیٹر لرنر نے ایک بیان میں کہا کہ 65 فلسطینیوں کو گرفتار کیا گیا ہے جن میں 51 وہ فلسطینی قیدی ہیں جو تل ابیب حکومت کی طرف سے تین سال قبل اپنے ایک فوجی جعیلاد شالت کی رہائی کے عوض رہا کیے جانے والے ایک ہزار ستائیس فلسطینی قیدیوں میں شامل تھے۔ اسرائیلی فوجی جعیلاد شالت کو 2006 ء میں حماس نے اپنے قبضے میں لے لیا تھا۔

اسرائیلی لیفٹیننٹ کرنل پیٹر لرنر کا ایک بیان میں کہنا تھا،" ہم نے دو متوازی کوششیں جاری کر رکھی ہیں، پہلی یہ کہ ہمارے گمشدہ تینوں لڑکوں کو بازیاب کروایا جائے دوسرے یہ کہ ہمیں حماس کی اس کارروائی کا جواب دینا ہے" ۔ اُدھر فلسطینیوں نے کہا ہے کہ اسرائیل کی طرف سے دوبارہ قید کیے جانے والے فلسطینیوں کی اکثریت کا تعلق حماس سے ہے۔ انہوں نے اسرائیل پر الزام عائد کیا کہ وہ قیدیوں کے تبادلے کے معاہدے کی خلاف ورزی کر رہا ہے۔ اس ڈیل میں مصر نے جزوی طور پر ثالثی کا کردار ادا کیا تھا۔ فلسطینی قیدیوں کے ایک کلب کے چیئرمین قدورا فارس اس بارے میں کہتے ہیں، " اسرائیل جو کچھ کر رہا ہے اُس کا سکیورٹی سے کوئی تعلق نہیں ہے، یہ محض انتقام کی پالیسی ہے" ۔ اس کلب کا کام اسرائیل کی حراست میں فلسطینیوں کی وکالت کرنا ہے۔

اُدھر ایک مصری اہلکار نے کہا ہے کہ قاہرہ، جو حماس اور فلسطینیوں کے دیگر دھڑوں کے ساتھ رابطے میں ہے، گمشدہ اسرائیلی لڑکوں کے بارے میں معلومات حاصل کرنے کے عمل میں اسرائیل کی مدد کر رہا ہے۔ تاہم اس اہلکار نے مصری اور فلسطینی میڈیا کی اُن خبروں کی تردید کی ہے جن کے تحت مصر کی اس سلسلے میں ثالثی پہلے سے ہی جاری تھی۔

آج بُدھ کو فلسطینی صدر محمود عباس نے جدہ منعقدہ اسلامک تعاون کی تنظیم او آئی سی کے ایک اجلاس کے موقع پر صحافیوں سے بات چیت کرتے ہوئے کہا،"گزشتہ ہفتے تین اسرائیلی ٹین ایجرز کو غرب اُردن سے اغوا کرنے والے عناصر فلسطینیوں کو نقصان پہنچانا چاہتے ہیں، وہ ہمیں نقصان پہنچانا چاہتے ہیں ہم انہیں اس کا ذمہ دار ٹھہرائیں گے"۔