'امن میں حصہ دار ہوں گے جنگ میں نہیں'

فواد چوہدری نے اس حوالے سے اپنی ٹویٹ میں مزید لکھا کہ پاکستان کی پوری کوشش ہے کہ کابل میں ایک پر امن اور فریقین کے اتفاق رائے سے حکومت قائم ہو لیکن اگر ایسا نہ ہوا تو بھی پاکستان میں اس کے اثرات کو نہیں آنے دیا جائے گا۔ انہوں نے کہا،''ہماری افغان پالیسی پاکستان کے مفاد میں ہے۔''

فواد چوہدری کا مزید کہنا تھا کہ وزیر اعظم عمران خان کہہ چکے ہیں کہ پاکستان امن میں حصہ دار ہو گا لیکن جنگ میں نہیں۔ فواد چوہدری نے کہا،''پاکستان کی سر زمین افغانستان کے خلاف استعمال نہیں ہو رہی اور امید ہے کہ افغانستان کی سرزمین پاکستان کے خلاف استعمال نہیں ہو گی، سیاسی پارلیمانی قیادت عدم مداخلت کے اصول پر متفق ہے۔''

وزیر اطلاعات کا یہ بیان ایک ایسے وقت میں سامنے آیا ہے، جب افغانستان سے بین الاقوامی افواج کے انخلاء کے ساتھ ساتھ خطے کی صورتحال تیزی سے تبدیل ہو رہی ہے۔ افغان طالبان دعویٰ کر رہے ہیں کہ وہ افغانستان کے پچاسی فیصد حصے کو کنٹرول کر رہے ہیں۔ کابل حکومت کی پوزیشن کمزور تر ہوتی دکھائی دے رہی ہے۔ ایسے میں کچھ تجزیہ کاروں کو خدشہ ہے کہ طالبان کی طاقت ور حیثیت سے خطے میں شدت پسندی کو فروغ مل سکتا ہے۔

کچھ روز قبل پاکستانی وزیر اعظم کے مشیر پرائے قومی سلامتی معید یوسف نے ایک بیان میں کہا تھا کہ پاکستان کے پڑوسی ملک افغانستان میں صورتحال 'انتہائی خراب'ہے اور صورتحال پاکستان کے قابو میں نہیں ہے۔ انہوں نے یہ خدشہ بھی ظاہر کیا کہ پاکستان میں تحریک طالبان پاکستان کے حملوں کا خطرہ بڑھ سکتا ہے۔ اس گروہ کے عسکریت پسند پاکستان میں مہاجرین کا روپ دھار کر داخل ہو سکتے ہیں۔

پاکستانی فوج کے ترجمان جنرل بابر افتخار کی جانب سے ابھی ایک حالیہ بیان میں کہا گیا ہے کہ پاکستان افغان امن عمل میں سہولت کار ہے نہ کہ ضامن۔

ب ج، ع ا