اربوں روپوں کی وصولی کے دعوے

پاکستان میں حکمران جماعت پی ٹی آئی کا کہنا ہے کہ اس کے دور اقتدار میں اربوں روپے کی ریکوری ہوئی ہے اور اگر بدعنوان سیاستدانوں کے مقدمات جلد از جلد نمٹا دیے جائیں تو پاکستان کو 30 کھرب روپے سے زیادہ مل سکتے ہیں۔ واضح رہے کہ اربوں روپے کی ریکوری کا دعوی پبلک اکاؤنٹس کمیٹی کے چیئرمین رانا تنویر حسین نے کیا تھا۔

کمیٹی نے کیسے مدد کی

حال ہی میں پبلک اکاؤنٹس کمیٹی سے ہٹائے جانے والے رکن قومی اسمبلی نور عالم خان کا کہنا ہے کہ کمیٹی کے سامنے مختلف بدعنوانی کے واقعات آتے ہیں۔ انہوں نے ڈی ڈبلیو کو بتایا، ''کمیٹی ایسے مقدمات کا جائزہ لینے کے بعد اور اس کی جانچ پڑتال کرنے کے بعد انہیں فیڈرل انویسٹی گیشن ایجنسی یا نیب کے سپرد کر دیتی ہے جو کارروائیاں کر کے پیسے کی ریکوری کرتے ہیں۔ ممکن ہے کہ کمیٹی نے اس طرح کے کیس تفتیشی اداروں اور نیب کو بھیجے ہوں جنہوں نے بعد میں ریکوری کی ہو۔‘‘

اس سے پہلے نیب نے بھی اربوں روپے کی ریکوری کا دعویٰ کیا تھا جس پر مختلف حلقوں کی طرف سے سوال اٹھے تھے۔ ڈوئچے ویلے نے جب اس حوالے سے نیب کے ایک آفیشل سے رابطہ کیا تو انہوں نے تفصیلات بھیجیں۔ ان تفصیلات میں دعویٰ کیا گیا ہے کہ ادارے کے قیام سے لے کر ستمبر 2021ء تک نیب نے 821 ارب روپے کے قریب ریکور کیے ہیں۔ اس میں زمین جائیداد اور دوسرے حوالوں سے وصول کی گئی رقم 500 ارب روپے سے زیادہ ہے۔ ریکور کی گئی اس رقم کو دعویدار متاثرین اور دوسرے متعلقہ اداروں میں تقسیم کر دیا گیا ہے۔ بینکوں کے نادہندگان سے 196 ارب سے زیادہ رقم ریکور کی گئی جبکہ نیب عدالتوں کی طرف سے کی گئے جرمانے کی مد میں 45 ارب روپے سے زیادہ وصول ہوئے۔ اس کے علاوہ پلی بارگین کے ذریعے 76 ارب روپے سے زیادہ وصول کیے گئے۔

تاہم کئی ناقدین ان دعووں کو شک کی نظر سے دیکھتے ہیں۔ سینیٹ کے سابق ڈپٹی چیئرمین سلیم مانڈوی والا کا کہنا ہے کہ اس ادارے کے تمام دعوے جھوٹ پر مبنی ہیں: ''جب ہم نے ان سے تفصیلات مانگیں تو انہوں نے تفصیلات بتانے سے معذرت کی۔ صرف یہ بتانا ضروری نہیں کہ کس مد میں پیسے کی ریکوری ہوئی ہے بلکہ اس کی ساری تفصیلات دینا بہت ضروری ہے۔‘‘

 پبلک اکاؤنٹس کمیٹی سے ہٹائے جانے والے رکن قومی اسمبلی نور عالم خان کا بھی یہی شکوہ ہے کہ نیب نے اس کی تفصیلات فراہم نہیں کیں: ''جب ادارے کے  چیئرمین سے تفصیلات کا پوچھا تو انہوں نے کہا کہ وہ جمع کرائیں گے لیکن تفصیلات بتائی نہیں گئیں اور صرف تفصیلات ہی ضروری نہیں ہوتیں، اس کے بعد ان کا آڈیٹر جنرل آف پاکستان سے آڈٹ بھی ہونا ہوتا ہے۔ لہٰذا تفصیلات سامنے آنی چاہییں۔‘‘

ریکوری کا پیسہ

سابق سیکرٹری پلاننگ کمیشن فضل اللہ قریشی کا کہنا ہے کے ضروری نہیں کہ یہ پیسہ قومی خزانے میں آئے۔ انہوں نے ڈی ڈبلیو کو بتایا، ''عموماﹰ ایسا پیسہ متاثرین میں تقسیم کر دیا جاتا ہے جس طرح کوآپریٹو اسکینڈل ہوا تھا اور اس میں ہزاروں لوگوں کے پیسے ڈوبے تھے جب وہ پیسے ریکور ہوئے تو ان تقسیم کر دیے گئے بالکل اسی طرح یہ پیسے متعلقہ اداروں کو بھیج دیے گئے ہوں گے اگر بینکوں کے پیسے وصول  ہوئے ہیں تو وہ بینکوں کو ملیں گے جب کہ وفاقی حکومت کے پاس بہت تھوڑا پیسہ آیا ہوگا۔‘‘

ان کا مزید کہنا تھا کہ کیونکہ جرمانے کے پیسے سرکاری خزانے میں جمع ہوتے ہیں اس لیے یہ کہا جاسکتا ہے کہ جرمانے کی مد میں نیب نے جو پیسے وصول کیے ہوں گے وہ سرکاری خزانے میں گئے ہوں گے: ''بہت ساری رقم  ایسی بھی ہو سکتی ہے جس کا تعلق صوبائی حکومتوں سے ہو تو وہ صوبائی حکومتوں کے پاس چلے گئے ہوں گے۔‘‘

تنقید کا جواب

تاہم  پی ٹی آئی کی رہنما مسرت جمشید چیمہ کا کہنا ہے اگر سیاستدانوں پر چلنے والے مقدمات جلد از جلد نپٹ جائیں تو پاکستان کو 30 کھرب روپے سے زیادہ مل سکتا ہے۔ انہوں نے ڈی ڈبلیو کو بتایا، ''بدقسمتی سے پاکستان میں بدعنوان سیاستدان اسٹے آرڈر لے لیتے ہیں اور پی ٹی آئی کی حکومت کے پاس دو تہائی اکثریت نہیں ہے کہ وہ عدالتی اصلاحات کے حوالے سے کوئی قانون سازی کر سکے لیکن اگر ان بدعنوان سیاستدانوں کے فیصلے ہو جاتے ہیں تو پاکستان کو تین ہزار ارب سے بھی زیادہ مل سکتے ہیں۔‘‘

مسرت چیمہ کے بقول صرف شہباز شریف کے مقدمے میں 16 ارب روپے کی ممکنہ طور پر ریکوری ہو سکتی ہے: ''موصوف کے مقدمے میں چپڑاسی اور نچلے درجے کے ملازمین اربوں روپیہ ان کے اکاؤنٹ میں ٹرانسفر کر رہے ہیں۔ اگر یہ فیصلہ ہوجائے تو صرف اسی فیصلے سے 16 ارب روپیہ حاصل ہو سکتا ہے۔‘‘