اسرائیل کا الاذقیہ پر فضائی حملہ، شامی دعوی

شام کے سرکاری میڈیا کے مطابق منگل کی علی الصبح اس کے بندرگاہی شہر الاذقیہ پر ایک اسرائیلی فضائی حملہ ہوا ہے۔ رواں ماہ میں یہ دوسری بار ہے جب ملک کے سرکاری میڈیا نے اس شہر  پر اس طرح کے حملے کی خبر دی ہو۔   

سات دسمبر کو بھی شام کے سرکاری میڈیا نے اسی طرح کی اطلاع دی تھی  کہ اسرائیل نے اپنے ایک حملے میں ایک گودام کو نشانہ بنایا، جس سے وہاں پر موجود کنٹینرز کو آگ لگ گئی تھی تاہم اس وقت کوئی جانی نقصان نہیں ہوا تھا۔

اسرائیل عموماً حملوں کے اس طرح کے دعووں پر رد عمل کے بجائے خاموشی اختیار کرتا ہے۔

شام کے سرکاری میڈیا ادارے صنعا نے فوجی حکام کے حوالے سے خبر دیتے ہوئے کہا، "صبح تقریبا تین بج کر اکیس منٹ پر اسرائیل نے بحیرہ روم کی سمت سے کئی میزائل فائر کیے اور الاذقیہ کی بندرگاہ پر موجود کنٹینر یارڈ کو نشانہ بنایا گيا۔"

ان حملوں سے نقصان کیا ہوا؟

صنعا کے مطابق اس حملے میں شام کا ایک فوجی ہلاک ہو گیا اور اس کے علاوہ  کچھ مالی نقصان بھی ہوا ہے۔ صنعا کے مطابق حملے کے سبب بندرگاہ کے کنٹینر اسٹوریج ایریا میں آگ لگ گئی۔ شام کے ایک اور  سرکاری ٹی وی چینل الاخباریہ نے حملے میں ایک ہسپتال، کچھ رہائشی عمارتوں اور دکانوں کو نقصان پہنچنے کی بھی اطلاع دی ہے۔

 ایک شامی اہلکار نے صنعا کو بتایا کہ حملے کے سبب لگنے والی آگ کو بجھانے میں عملے کو تقریباً ایک گھنٹے کا وقت لگا۔ شام سے متعلق برطانیہ میں مقیم ایک ادارے 'سیریئن آبزرویٹری فار ہیومن رائٹس' نے حملوں کی تصدیق کرتے ہوئے کہا کہ رواں برس کے آغاز سے اب تک شام پر یہ 28واں حملہ ہے،''اس حملے میں شام کے فضائی دفاعی نظام کو نشانہ بنایا گيا۔‘‘

اس سے قبل شامی میڈیا ادارے صنعا نے ایک فوجی ذرائع کے حوالے سے خبر دی تھی، "اسرائیل نے گولان کی جانب متعدد فضائی حملوں سے کئی ٹھکانوں کو  نشانہ بنانے کی کوشش کی۔‘‘ اس کے مطابق ان حملوں میں بھی ایک شامی فوجی ہلاک ہو گیا تھا۔

حملے کی وجہ کیا ہو سکتی ہے؟

ان حملوں کے بارے میں اسرائیلی فوج کی جانب سے کوئی تبصرہ نہیں کیا گیا۔ اسرائیل حملوں کے شامی دعووں پر شاذ و نادر ہی بات کرتا ہے۔ البتہ اس نے اس بات کا اعتراف ضرور کیا ہے کہ وہ شیعہ ملیشیا حزب اللہ جیسی ایران کی اتحادی ملیشیا کے ٹھکانوں کو نشانہ بناتا ہے۔

شام اور اسرائیل سن 1967  کی جنگ کے بعد سے گولان کی پہاڑیوں کے بھی ایک علاقائی تنازعے میں الجھے ہوئے ہیں، جس پر اسرائیل نے قبضہ کر لیا تھا اور وہاں اسرائیل نے بستیاں تعمیر کر دی ہیں۔

اسرائیل شام کے اتحادی ایران کے جوہری پروگرام کا سخت مخالف ہے۔ پچھلے ہفتے کے اواخر میں ایران نے خلیج فارس میں اپنی فوجی مشقوں کے دوران اسرائیل کو خبردار کرنے کے لیے میزائل بھی داغے تھے۔

ص ز/   (اے ایف پی، ڈی پی اے، روئٹرز)