اسرائیل کا فلسطینی قیدیوں کی رہائی کے ساتھ نئی یہودی آبادکاری کا منصوبہ

جمعرات کے روز ایک اسرائیلی عہدیدار نے بتایا ہے کہ اگلے ہفتے اسرائیلی جیلوں میں قید فلسیطنی قیدیوں کی تیسری کھیپ رہا کر دی جائے گا، تاہم اس موقع پر مزید یہودی بستیوں کی تعمیر کا اعلان بھی ہو گا۔ اسرائیل اور فلسطینی انتظامیہ کے درمیان جاری براہ راست امن مذاکرات کے تحت اسرائیلی جیلوں میں قید فلسیطنی قیدیوں کو بتدریج رہا کیا جا رہا ہے۔ خبر رساں ادارے اے ایف پی کے مطابق اسرائیل اگلے ہفتے مغربی کنارے اور مشرقی یروشلم کے مقبوضہ علاقوں میں نئی یہودی آباد کاری کے لیے ٹینڈر جاری کرے گا۔

خیال رہے کہ امریکی وزیرخارجہ جان کیری اور یورپی یونین کی جانب سے تنقید کے باوجود چند روز قبل اسرائیلی وزیراعظم نیتن یاہو نے کہا تھا کہ نئی یہودی بستیوں کی تعمیر جاری رہے گی۔ اسرائیلی وزیراعظم کا کہنا ہے کہ وہ نئی یہودی آباد کاری کے سلسلے میں تعمیر کے پروگرام کو ایک لمحے کے لیے نہیں بھی روکیں گے۔ نیتن یاہو کے مطابق وہ اپنے ملک کی تعمیر و ترقی میں مشغول ہیں اور یہ ملک کو مزید طاقتور بنانے کے علاوہ ترقی کے راستے کو مزید کشادہ کرے گا۔ انہوں نے اِن خیالات کا اظہار اپنی سیاسی جماعت لیکود پارٹی کے اراکین سے ملاقات کے دوران کیا تھا۔

اسرائیل کے اہم روزنامے ہاریٹز کے مطابق امریکی وزیرخارجہ جان کیری اِس کوشش میں ہیں کہ وہ اسرائیلی حکومت کو نئے تعمیراتی منصوبوں سے دور رکھے تا کہ امن مذاکرات کا جو سلسلہ جولائی میں شروع ہوا ہے، وہ بحال رہے۔ امن مذاکرات کے معطل شدہ عمل کو بحال کرنے کے حوالے سے فلسطینیوں اور اسرائیلی حکومت کے درمیان جو مفاہمت طے پائی تھی، اُس کے تحت فلسطینیوں قیدیوں کی تیسری کھیپ میں 26 قیدی اتوار کو رہا کیے جا رہے ہیں۔ قیدیوں کے ناموں کی تفصیلات ابھی جاری نہیں کی گئی ہیں۔ تیسری کھیپ کے بعد اگلی کھیپ اگلے سال مارچ میں رہا کی جائے گی۔

دوسری جانب غزہ میں فلسطینی عسکریت پسندوں کی جانب سے جمعرات کے روز دو راکٹ داغے گئے جو جنوبی اسرائیل میں گرے۔ اس واقعے کے بعد اسرائیلی کی جانب سے غزہ پٹی میں فضائی حملے کیے گئے ہیں۔ اسرائیلی حکام کے مطابق غزہ سے داغے جانے والے یہ دونوں راکٹ ایک کھلے علاقے میں گرے اور کوئی جانی نقصان نہیں ہوا۔ اسرائیلی بیان کے مطابق لڑاکا طیاروں نے غزہ میں ایک اسلحہ ساز فیکٹری اور اسلحے کے ایک گودام کو نشانہ بنایا۔ ادھر فلسطینی طبی ذرائع کا کہنا ہے کہ اسرائیلی فضائی کارروائی کے نتیجے میں ایک فلسیطنی زخمی ہوا ہے۔