اسرائیل کے ناقابل تسخیر ہونے کا بھرم ٹوٹ گیا، جواد ظریف

خبر رساں ادارے روئٹرز کے مطابق ایرانی وزیر خارجہ کا یہ بیان اسرائیلی وزیر اعظم بینجمن نیتن یاہو کی طرف سے جرمن شہر میونخ میں منعقدہ سکیورٹی کانفرنس کے دوران ان کے خطاب کے رد عمل میں سامنے آیا ہے۔

میونخ سکیورٹی کانفرنس سے خطاب کرتے ہوئے محمد جواد ظریف  کا کہنا تھا، ’’اسرائیل اپنے ہمسایوں کے خلاف جارحیت کو بطور پالیسی استعمال کرتا ہے۔‘‘ انہوں نے اس موقع پر اسرائیل پر الزام عائد کیا کہ وہ ’اپنے ہمسایوں کے خلاف بڑے پیمانے پر انتقامی کارروائیاں کرتا ہے اور شام اور لبنان میں روزانہ کی بنیاد پر مداخلت کرتا ہے۔‘ ایرانی وزیر خارجہ کے مطابق، ’’شام نے ایک بار اس کے ایک جہاز کو کيا گرايا کہ جيسے آفت ہی آ گئی۔‘‘

محمد جواد ظریف کا یہ ردعمل اسرائیلی وزیر اعظم بینجمن نیتن یاہو کے خطاب کے چند گھنٹے بعد سامنے آیا۔ اپنے اس خطاب میں نیتن یاہو نے ایک ایسا ٹکڑا دکھایا جو ان کے بقول ایک ایرانی ڈرون طیارے کا حصہ تھا اور جسے چند روز قبل ایک اسرائیلی ہیلی کاپٹر نے مار گرایا تھا۔ اسرائیلی وزیر اعظم نے ایران پر الزام عائد کیا کہ وہ پورے مشرق وُسطیٰ میں اپنی سلطنت قائم کرنا چاہتا ہے۔

’ہمیں آزماؤ نہیں‘ نیتن یاہو کی ایران کو تنبیہ

اسرائیل کو شام میں ابھی اور ’سرپرائز‘ ملیں گے، دمشق کی تنبیہ

ایف سولہ شامی میزائل سے تباہ ہوا، اسرائیلی اہلکار

ایرانی وزیر خارجہ نے میونخ سکیورٹی کانفرنس کے دوران اپنے خطاب کے دوران مزید کہا، ’’جو کچھ پچھلے چند روز کے دوران ہوا، وہ (اسرائیل) کے نام نہاد ناقابل تسخیر ہونے کا تصور ٹکڑے ٹکڑے ہو جانا ہے۔‘‘

10 فروری کو شام میں ایک جنگی آپریشن کے بعد واپس اسرائیل لوٹنے والے ایک ایف سولہ جنگی طیارے کو شامی سرحدی حدود کے اندر نشانہ بنایا گیا تھا جس کے بعد یہ طیارہ گر کر تباہ ہو گیا۔ تاہم اس کے دو پائلٹ محفوظ رہے۔ یہ جنگی جہاز اُن کم از کم آٹھ طیاروں میں سے ایک تھا جو شام میں ایرانی اور شامی اہداف کو نشانہ بنانے کے بعد واپس لوٹ رہے تھے۔ اسرائیل کا کہنا تھا کہ یہ کارروائی ایک ایرانی ڈرون طیارے کو اسرائیلی حدود میں مار گرائے جانے کے بعد کی گئی تھی۔

اسرائیلی ایئر فورس کے ایک سابق سربراہ ڈیوڈ ایوری نے خبر رساں ادارے روئٹرز کو قبل ازیں بتایا کہ یہ شاید پہلا موقع ہے کہ اسرائیل کے کسی ایف سولہ جنگی طیارے کو مار گرایا گیا ہے۔ اسرائیل نے ان طیاروں کے استعمال کا آغاز 1980ء کی دہائی میں کیا تھا۔

اسرائیلی حکام کے مطابق مذکورہ ایف سولہ طیارہ شام کے ایک اینٹی ایئرکرافٹ میزائل کا نشانہ بنا تھا اور یہ اسرائیل کے شمالی حصے میں گِر کر تباہ ہوا۔