امریکا: ٹرمپ کی سیاست کے خلاف مظاہرے، چھ سو مظاہرین گرفتار

واشنگٹن سے جمعہ انتیس جون کو ملنے والی نیوز ایجنسی کے این اے کی رپورٹوں کے مطابق یہ سینکڑوں مظاہرین مقامی وقت کے مطابق جمعرات کی شام ملکی صدر ٹرمپ کی اس حکمت عملی کے خلاف صدائے احتجاج بلند کر رہے تھے، جس کے تحت ڈونلڈ ٹرمپ نے دیگر ممالک سے تارکین وطن کی غیر قانونی طور پر امریکا آمد کے خلاف ’صفر برداشت‘ کی سوچ کا اعلان کر رکھا ہے۔

ان قریب 600 گرفتار شدگان میں اکثریت خواتین مظاہرین کی ہے۔ یہ افراد غیر قانونی تارکین وطن کے ان خاندانوں کے ساتھ اظہار یکجہتی اور ان سے امریکی حکام کے ناروا سلوک کے خلاف احتجاج کر رہے تھے، جن کے نابالغ بچوں کو ان کے والدین سے علیحدہ حراست میں رکھا جا رہا ہے۔

ٹرمپ انتظامیہ کے اس اقدام پر بہت سی تنظیموں نے یہ کہہ کر شدید تنقید کی ہے کہ وہ تارکین وطن کے خلاف اپنی کارروائیوں میں مبینہ طور پر یہ بھی بھول گئی ہے کہ کسی بھی طرح کے حالات میں بالغوں کے بنیادی انسانی حقوق اور بچوں کے حقوق کا لازمی طور پر خیال رکھا جانا چاہیے۔

ان مظاہروں کا اہتمام کرنے والی سرکردہ شخصیات میں شامل ایک خاتون سماجی کارکن لِنڈا سارسور نے نیوز ایجنسی کے این اے کو بتایا، ’’امریکی پارلیمان کی عمارت کے سامنے اس احتجاج میں خاص طور پر بہت بڑی تعداد میں خواتین اس لیے شامل ہوئیں کہ وہ تارکین وطن کے خاندانوں کی امریکی حکام کی طرف سے جبری تقسیم اور نابالغ بچوں کے ان کے والدین سے علیحدگی کے بعد مختلف حراستی مراکز میں رکھنے جانے پر شدید نالاں تھیں۔‘‘

واشنگٹن میں ملکی کانگریس کے سامنے ان احتجاجی مظاہروں میں ہزارہا افراد شریک ہوئے اور ان کا مطالبہ تھا کہ ٹرمپ انتظامیہ غیر قانونی تارکین وطن کو ’مجرم بنا کر پیش کرنے‘ سے باز رہے۔ بتایا گیا ہے کہ گرفتار شدگان میں مبینہ طور پر امریکی کانگریس کے کئی ارکان بھی شامل ہیں، جو ’مظاہرین کے موقف سے اتفاق کرتے ہوئے ان میں گھل مل گئے تھے‘ لیکن گرفتار کر لیے گئے۔

آئندہ ویک اینڈ پر (ہفتہ تیس جون اور اتوار یکم جولائی کو) امریکا میں تارکین وطن کی نمائندہ کئی تنظیموں اور شہری اور انسانی حقوق کے تحفظ کے لیے سرگرم کئی اداروں  نے ٹرمپ انتظامیہ کی تارکین وطن سے متعلق سیاست کے خلاف واشنگٹن میں وائٹ ہاؤس کے سامنے بھی ایک بہت بڑے احتجاجی مظاہرے کا پروگرام بنا رکھا ہے۔

م م / ش ح / کے این اے