امریکا کا طالبان کے خلاف افغان فورسز کی مدد کا وعدہ

امریکی فوج کے ایک سینیئر افسر نے 25 جولائی اتوار کے روز کہا کہ آنے والے ہفتوں کے دوران امریکا طالبان کے خلاف بر سر پیکار افغان فورسز کی مدد کے لیے فضائی حملے جاری رکھے گا۔ تاہم فوجی افسر نے اس بات کی وضاحت کرنے سے گریز کیا کہ آیا اگست کے اختتام پر جب امریکی فوجی انخلاء مکمل ہو جائے گا اس کے بعد بھی فضائی حملوں کا سلسلہ جاری رہے گا یا نہیں۔

افغانستان میں بیرونی افواج کے انخلا کے دوران ہی حکومتی فورسز اور طالبان کے درمیان معرکہ آرائی جاری ہے جس میں طالبان نے کافی پیش قدمی کر لی ہے۔ اس وقت ملک کے تقریباً نصف اضلاع پر طالبان کا کنٹرول ہے اور مغربی طاقتوں کو اب اس بات کی فکر لاحق ہے کہ کہیں طالبان حکومت پر فتح حاصل کر کے پھر سے اپنا پرانا اقتدار نہ تھوپ دیں۔

امریکا نے کیا کہا ہے؟

 امریکی جنرل کینتھ میکنزی نے کابل میں صحافیوں سے بات چیت کے دوران اس بات پر تبصرہ کرنے سے انکار کر دیا کہ کیا امریکا 31 اگست تک فوجی انخلا مکمل ہو نے کے بعد بھی طالبان کے خلاف اپنے فضائی حملے جاری رکھے گا یا نہیں۔ تاہم انہوں نے اس بات پر زور دیا کہ مشن کے اختتام کے بعد بھی امریکا، ''افغان فورسز کی حمایت جاری رکھے گا، گرچہ یہ عموماً افق (فضا) سے ہو گی۔''

ان کا مزید کہنا تھا، ''امریکا نے گزشتہ کئی روز کے دوران افغان فورسز کی حمایت میں فضائی حملوں میں اضافہ کر دیا ہے اور اگر طالبان نے اپنے حملے جاری رکھے تو ہم آنے والے ہفتوں میں بھی اس اعلٰی سطح کی حمایت کو جاری رکھنے کے لیے تیار ہیں۔''

جنرل میکنزی کا کہنا تھا آنے والے دن اور ہفتے یہ فیصلہ کرنے میں اہم ثابت ہوں گے کہ آیا افغان حکومت طالبان سے ملک کا دفاع کر سکتی ہے یا نہیں۔ ان کا کہنا تھا، ''مجھے نہیں لگتا ہے کہ یہ راستہ آسان ہوگا، تاہم میں اس بیانیے پر بھی یقین نہیں رکھتا کہ ملک میں خانہ جنگی شروع ہو جائے گی۔''

زمینی حالات کیا ہیں؟

جنوبی شہر قندھار کے مضافاتی علاقوں میں اتوار کے روز بھی شدید لڑائی جاری رہی جہاں گزشتہ ایک ماہ کے دوران لڑائی کے سبب تقریبا ً22 ہزار خاندان بے گھر ہو گئے ہیں۔  قندھار میں تقریباً سات لاکھ افراد رہتے ہیں جو ملک کا دوسرا بڑا شہر ہے۔

سنہ 1996 سے 2001  کے دوران جب افغانستان میں طالبان کا اقتدار تھا اس وقت بھی قندھار طاقت کا اہم مرکز ہوا کرتا تھا۔ میکنزی نے اس بات کا اعتراف کیا کہ امریکی جنگی جہازوں نے حالیہ دنوں میں بھی قندھار کے علاقوں میں بمباری کی ہے۔

بعض انسانی حقوق کی تنظیموں کا کہنا ہے کہ جن علاقوں پر طالبان نے قبضہ کیا ہے وہاں وہ عام لوگوں پر ظلم و زیادتی کر رہے ہیں۔ تاہم طالبان نے اس کی سختی سے تردید کی ہے۔

ایچ آر ڈبلیو کی ایسو سی ایٹ ایشیا ڈائریکٹر پیٹریشیا گراس مین نے ایک بیان میں کہا، ''طالبان رہنماؤں نے کسی بھی طرح کی زیادتیوں کی ذمہ داری سے انکار کیا ہے، لیکن ان کے زیر اقتدار علاقوں میں ملک بدری، من مانی نظر بندیاں اور ہلاکتوں کے بڑھتے ہوئے واقعات اس بات کا ثبوت ہیں کہ مقامی آبادی میں خوف و ہراس بڑھ رہا ہے۔''

 ض ز/ ج ا (اے ایف پی، روئٹرز)