امریکہ نے جرمنی میں یوکرینی فوجیوں کی تربیت کا آغاز کر دیا

امریکی محکمہ دفاع پینٹاگون نے جمعہ 29 اپریل کو کہا کہ وہ جرمنی میں یوکرین کے فوجیوں کو تربیت فراہم کر رہا ہے اور جدید ہتھیاروں کے نظام کو سیکھنے میں وہ ان کی مدد کر رہا ہے۔

تربیتی پروگرام کے بارے میں ہمیں کیا معلوم ہے؟

امریکی محکمہ دفاع کے ترجمان جان کربی نے ایک پریس کانفرنس میں کہا، ’’آج میں یہ اعلان کر سکتا ہوں کہ امریکہ نے جرمنی کے اپنے فوجی اڈوں پر یوکرین کی مسلح افواج کو اہم سسٹمز کی تربیت دینے کا آغاز کر دیا ہے۔‘‘

کربی کا کہنا تھا کہ تربیتی پروگرام جرمن حکومت کے ساتھ ہم آہنگی سے چل رہا ہے۔ انہوں نے کہا، ’’ہم جرمنی کی طرف سے مسلسل حمایت کے لیے شکر گزار ہیں۔‘‘

اب تک تقریباً 50 یوکرینی اہلکاروں کو طویل فاصلے تک مار کرنے والے ہتھیار ہوٹزر کی تربیت دی جا چکی ہے۔ یوکرینی فوجیوں کو ریڈار سسٹم اور بکتر بند گاڑیوں کے استعمال کا بھی طریقہ کار سیکھایا جائے گا۔

فلوریڈا نیشنل گارڈ کی یوکرینی فورسز کو دوسری بار تربیت

جان کربی نے بتایا کہ اس تربیت کا بیشتر کام اور ذمہ داری فلوریڈا نیشنل گارڈ کو سونپا گیا ہے۔ اسی امریکی یونٹ نے روسی حملے سے پہلے رواں برس فروری میں یوکرین کی افواج کو تربیت  فراہم کی تھی۔

کربی نے کہا، ’’ہمیں بتایا گیا ہے کہ فلوریڈا نیشنل گارڈ کی اپنے یوکرینی ساتھیوں کے ساتھ یہ دوسری ملاقات بڑی جذباتی تھی، کیونکہ فروری میں عارضی طور پر علیحدگی سے قبل، ایک ساتھ رہنے اور ایک ساتھ کام کرنے کی وجہ سے دونوں میں کافی گہرا لگاؤ پیدا ہو گیا تھا۔‘‘

انہوں نے مزید کہا کہ یوکرین کی فوج، ’’بنیادی طور پر خود کو تربیت دینے والی ہے، کیونکہ یہ سب یوکرین واپس جائیں گے اور  وہاں اپنے دیگر ساتھیوں کو تربیت دیں گے۔‘‘ پینٹاگون کے ترجمان نے مزید کہا کہ یوکرینی افواج کی تربیت یورپ کے دیگر حصوں میں بھی ہو رہی ہے، تاہم انہوں نے ان مقامات کا انکشاف نہیں کیا۔

امریکی صدر جو بائیڈن نے مارچ کے اواخر میں کہا تھا کہ امریکی فورسز پولینڈ میں یوکرینی افواج کو تربیت دے رہی ہیں، لیکن بعد میں عسکری حکام نے یہ بیان واپس لے لیا تھا۔

ادھر روس نے یوکرینی افواج کو مسلح کرنے کے خلاف مغربی ممالک کو خبردار کیا ہے۔ اس سے قبل مارچ میں روس نے مغربی ممالک کو متنبہ کرنے کے لیے پولینڈ کی سرحد کے قریب یوکرین میں ایک تربیتی مرکز پر حملہ بھی کیا تھا۔

ص ز/ا ب ا (روئٹرز، ڈی پی اے)