اور اب ملکہء برطانیہ بھی فیس بُک پر

84 سالہ برطانوی ملکہ کے دفتر سے جاری ہونے والے بیان کے مطابق ملکہ کے فیس بک فین پیج پر ملکہ کی مصروفیات کی تازہ ترین ویڈیوز ، تصاویر اور خبریں شامل کی جائیں گی۔ ملکہ کے علاوہ ولی عہد شہزادہ چارلس اور ان کے دونوں بیٹوں شہزادہ ولیم اور ہیری کے بارے میں تفصیلات بھی اس پیج پر دستیاب ہوں گی۔

ملکہ کے فین پیج کو جوائن کرنے والے فیس بُک صارفین بکنگھم پیلس کے نام پیغامات کے علاوہ اپنے تبصرے بھی روانہ سکیں گے۔ بیان کے مطابق برطانوی شاہی خاندان کی مصروفیات بھی اس سائٹ پر جاری کی جائیں گی۔

سابقہ دن کی مصروفیات کی تفصیلات پر مشتمل سرکلر سن 1803 میں اس وقت کے بادشاہ جارج سوم نے بھی جاری کرنے کا آغاز کیا تھا، مگر اس کی وجہ اخبارات کی غلط رپورٹنگ تھی۔

تاہم اس فیس بُک پیج پر ملکہ کو ‘Poke'نہیں کیا جاسکے گا کیونکہ یہ ملکہ کا پروفائل پیج نہیں ہے۔ بکھنگم پیلس کی طرف سے ملکہ کی نئی ٹیکنالوجی سے جڑے رہنے کی خواہش کا اظہار کیا جاتا رہا ہے۔ برطانوی ملکہ بلیک بیری سمارٹ فون اور آئی پوڈ بھی استعمال کرتی ہیں۔ شاہی خاندان سے وابستہ حکام کے مطابق ملکہ کی طرف سے پہلی ای میل1976 میں بھیجی گئی تھی۔

برطانیہ کے شاہی خاندان کا پہلے سے ہی تصاویر شیئر کرنے والی ویب سائٹ فلکر پر اکاؤنٹ موجود ہے۔ اس کے علاوہ شاہی خاندان نے سال2009 میں ٹویٹر بھی جوائن کیا، جبکہ یوٹیوب پر ویڈیو چینل بھی سال 2007ء سے موجود ہے۔

رپورٹ : افسراعوان

ادارت : شادی خان سیف