ایران منجمد فنڈز کے اجراء کا منتظر

اقوام متحدہ کی جانب سے مطلع کيا گیا ہے کہ ايران ميں موجود ايک ايرانی امريکی شہری کے بيٹے کو رہا کر ديا گيا ہے اور اب وہ ملک چھوڑ سکتے ہيں۔ اس فیصلے کے بعد ایرانی حکومت بیرونی ممالک کی جانب سے منجمد کیے جانے والے سات بلین ڈالر کے اثاثوں کی بحالی کا منتظر ہے۔

 پچاسی سالہ باقر نمازی اور ان کے پچاس سالہ بيٹے سيامک نمازی کی رہائی کی تصديق امريکی محکمہ خارجہ نے بھی کر دی ہے۔ ان دونوں کو اکتوبر سن 2016 ميں جاسوسی کا جرم ثابت ہونے پر دس سال قيد کی سزا سنا دی گئی تھی تاہم امريکا اس کيس اور فيصلے کو غلط قرار ديتا ہے۔ باقر یونیسیف کے ایک سابق اہلکار ہیں جنہیں فروری 2016ء اس وقت حراست میں لیا گیا تھا جب وہ اپنے بیٹے سیامک کی رہائی کے لیے دباؤ ڈالنے کے لیے ایران گئے تھے۔ ان کے بیٹے کو اس سے پچھلے سال اکتوبر 2015ء میں گرفتار کیا گیا تھا۔

اقوام متحدہ کی کئی ماہ سے کوشش تھی کہ ايران اور عالمی طاقتوں کے مابين جوہری ڈيل کی بحالی کے ليے چار امريکی شہريوں کی رہائی ممکن بنائی جائے، جن ميں يہ دو افراد بھی شامل تھے۔

ایران کے سرکاری خبر رساں ادارے ارنا کے مطابق دونوں ممالک کے قیدیوں کی رہائی کے لیے ایران اور امریکہ کے درمیان مذاکرات کو حتمی شکل دینے کے بعد ایران کے مسدود وسائل میں سے 7 بلین ڈالر جاری کیے جائیں گے۔

عالمی طاقتوں کے ساتھ تہران کے جوہری معاہدے سے یکطرفہ طور پر دستبرداری کے بعد سن 2018 میں امریکہ کی جانب سے اسلامی جمہوریہ پر دوبارہ پابندیاں عائد کرنے کے نتیجے میں چین، جنوبی کوریا اور جاپان  سمیت کئی ممالک میں اربوں ڈالر کے ایرانی فنڈز منجمد کر دیے گئے تھے۔

تہران نے سیول پر الزام عائد کیا ہے کہ اس نے ان فنڈز میں سے 7 بلین ڈالرز کو منجمد کر رکھا ہے اور ایران کی جانب سے بار بار جنوبی کوریا کے حکام سے اسے جاری کرنے کا مطالبہ کیا گیا ہے۔ ایرانی سرکاری خبر رساں ادارے کے مطابق واشنگٹن ایک ہی وقت میں تہران میں زیر حراست اپنے شہریوں کی رہائی اور جنوبی کوریا سے ایرانی فنڈز کے اجراء میں مصروف عمل ہے۔

یہ تمام پیشرفت ایسے وقت پر سامنے آئی ہے جب سن 2015 کے جوہری معاہدے کو بحال کرنے کے لیے اپریل سن 2021 سے مذاکرات وقتاً فوقتا جاری ہیں۔ اس معاہدے کے تحت ایران کو اس کے جوہری پروگرام پر روک لگانے کے بدلے میں اس پر لگی سخت ترین پابندیوں سے چھوٹ ملے گی يا ان ميں نرمی کی جائے گی۔

ایران کی جانب سے ماضی میں بارہا یہ پانابندیاں ہٹانے کا مطالبہ کیا جاتا رہا ہے۔ اس کے ساتھ ایران اس بات کی ضمانت بھی چاہتا ہے کہ امریکہ دوبارہ بحال ہونے والے اس جوہری معاہدے سے پیچھے نہیں ہٹے گا۔

ر ب/ ع س (اے ایف پی)