ایران کے ساتھ معاہدے کا کوئی خاص فائدہ نہیں ہوا، نیتن یاہو

بینجمن نیتن یاہو نے منگل کو تل ابیب میں ایک سکیورٹی کانفرنس سے خطاب میں الزام عائد کیاکہ ایران عبوری معاہدے کو جوہری ہتھیار بنانے کے لیے وقفے کے طور پر استعمال کر رہا ہے۔ انہوں نے کہا: ’’ہمارا تجزیہ ہے کہ ایران جہاں پہلے کھڑا تھا، اس معاہدے نے اسے وہاں سے صرف چھ ہفتے پیچھے دھکیلا ہے، اس سے زیادہ نہیں۔‘‘

اسرائیلی وزیر اعظم نے مزید کہا: ’’لہٰذا ایران کو جوہری استعداد سے باز رکھنے کے لیے اب مستقبل معاہدے کا امتحان باقی ہے، اگر وہ طے پاتا ہے تو۔‘‘

ایران نے رواں ماہ بین الاقوامی عبوری معاہدے کو نافذ کرنا شروع کیا ہے۔ امریکا سمیت اقوام متحدہ کی سلامتی کونسل کے پانچ مستقل ارکان اور جرمنی نے گزشتہ ماہ جنیوا میں ایران کے ساتھ ایک معاہدہ کیا تھا جس کے تحت تہران حکومت اپنے جوہری منصوبے کے بعض حصوں کو منجمد کرنے پر تیار ہے۔ اس کے بدلے میں اس کے خلاف پابندیاں نرم کی جائیں گی جس سے اسے سات بلین ڈالر کا فائدہ پہنچے گا۔ نتین یاہو نے اس معاہدے کو ’تاریخی غلطی‘ قرار دیتے ہوئے اس کی مذمت کی تھی۔ انہوں نے ایران پر عائد پابندیوں پر نرمی کے اقدامات پر بھی تنقید کی تھی۔

خبر رساں ادارے روئٹرز کے مطابق مغربی ماہرین کی رائے نیتن یاہو کے تازہ اندازوں کے برعکس رہی ہے۔ گزشتہ برس جنیوا میں طے پانے والے معاہدے کے بعد ان کا کہنا تھا کہ اس کی شرائط کے سبب ایران کی جانب سے ممکنہ طور پر جوہری بم حاصل کرنے کا راستہ بند ہو گیا ہے۔

عبوری معاہدے کے تحت چھ ماہ کے عرصے میں اعتماد سازی کا عمل بھی چلایا جائے گا۔ امریکا اسرائیل کو یقین دہانی کروا چکا ہے کہ ایران کے ساتھ مستقل معاہدے کے لیے اس سے مشاورت کی جائے گی۔

اسرائیل خبردار کر چکا ہے کہ ضرورت پڑی تو جوہری ہتھیاروں کے حصول کی ایرانی کوششوں کا راستہ روکنے کے لیے طاقت استعمال کی جائے گی۔ خیال ظاہر کیا جاتا ہے کہ اسرائیل مشرقِ وسطیٰ کی واحد جوہری طاقت ہے۔ تاہم اسرائیل نے کبھی اس بات کی تصدیق یا تردید نہیں کی۔

یہ امر بھی اہم ہے کہ واشنگٹن انتظامیہ اور دیگر عالمی طاقتوں کی جانب سے ایران کے ساتھ معاہدے کے باوجود بعض امریکی ارکانِ کانگریس ایران کے خلاف مزید سخت کارروائیوں کے لیے زور دیتے رہے ہیں۔

عالمی طاقتیں اس شبے کا اظہار کرتی رہیں کہ ایران اپنے جوہری منصوبے کی آڑ میں نیوکلیئر ہتھیار حاصل کرنا چاہتا ہے۔ تاہم تہران حکام کا مؤقف رہا ہے کہ ان کا ایٹمی پروگرام پرامن مقاصد کے لیے ہے۔