ایرانی صدارتی انتخابات: نتیجے کا اثر جوہری معاہدے پر پڑے گا

بین الاقوامی مبصرین اور سفارتکاروں کا خیال ہے کہ اٹھارہ جون کے صدارتی انتخابات کا براہِ راست اثر ایران اور عالمی طاقتوں کے درمیان ہونے والے جوہری معاہدے پر مرتب ہو گا۔ اب تک عالمی طاقتیں قدرے اعتدال پسند صدر حسن روحانی کے ساتھ مکالمت کا عمل جاری رکھے ہوئے تھیں۔ اب آٹھ برس منصب صدارت پر فائز رہنے کے بعد روحانی کے اقتدار کا سورج غروب ہونے والا ہے۔

ایرانی صدارتی الیکشن میں نوجوانوں کی دلچسپی انتہائی کم

سن 2015 میں طے پانے والی جوہری ڈیل کا ڈھانچہ سابق امریکی صدر ڈونلڈ ٹرمپ کے دور میں (سن 2018) اس وقت منہدم ہو گیا، جب انہوں نے یک طرفہ طور پر اس معاہدے سے علیحدگی اختیار کر لی تھی۔

سخت پابندیاں اور نگرانی کا عمل

ایران اس وقت ٹرمپ دور میں عائد کی جانے والی شدید نوعیت کی اقتصادی پابندیوں میں تبدیلی کا خواہشمند ہے اور دوسرا فریق یعنی عالمی طاقتیں یہ چاہتی ہیں کہ ایرانی جوہری پروگرام کی نگرانی مزید سخت کرنے کے ساتھ ساتھ یورینیئم کے ذخیرے کو بھی محدود کر دیا جائے۔

یہ امر اہم ہے کہ ٹرمپ کی پابندیوں کے جواب میں ایران نے یورینیئم افزودگی کی سطح کو بلند کیا تھا۔ ایران اس وقت یورینیئم کی افزودگی کو اعلیٰ سطح پر جاری رکھے ہوئے ہے۔ یورینیئم افزودگی کی یہ سطح ابھی بھی جوہری ہتھیار سازی کے لیے کم ہے۔ ویسے بھی ایران کا اصرار ہے کہ اس کا جوہری پروگرام پرامن مقاصد کے لیے ہے۔

عراق کے الیکشن، مقتدیٰ الصدر کی ’حیران کن برتری‘

سخت گیر صدر کا ممکنہ انتخاب

تجزیہ کاروں کا خیال ہے کہ سخت گیر موقف رکھنے والے امیدوار انتخابی مہم  کے دوران اقتصادی پابندیوں کے تناظر میں امریکا کو اپنا ہدف بنائے ہوئے تھے اور کسی ایسے امیدوار کی کامیابی سے بات چیت کا عمل مشکلات کا شکار ہو سکتا ہے۔ مبصرین کا خیال ہے کہ سخت گیر صدر کا منصب سنبھالنے کے بعد بات چیت کو نئی رکاوٹوں کا سامنا ہو سکتا ہے۔

پیچیدہ بین الاقوامی سیاسی معاملات پر نگاہ رکھنے والے یوریشیا گروپ نامی تھنک ٹینک کے ایک تجزیہ کار ہنری روم کے خیال میں سخت گیر صدر سے بہرحال اتنی مشکلات پیدا نہیں ہوں گی جتنی کہ سن 2015 میں اس معاہدے کو حتمی شکل دینے میں ہوئی تھیں۔ روم کا کہنا ہے کہ اس وقت بھی فریقین اُسی سابقہ ڈیل کی بحالی پر توجہ مرکوز کیے ہوئے ہیں۔

صدر جو بائیڈن اور ان کے سفارت کار دوسری طاقتوں کے ساتھ مل کر ویانا میں ایران کے ساتھ مذاکراتی عمل جاری رکھے ہوئے ہیں تا کہ ڈیل کی بحالی کا بہتر اور مناسب راستہ تلاش کیا جا سکے۔

عام انتخابات کے تین ماہ بعد نئی ایرانی پارلیمان کا اولین اجلاس

مزید نکات پر گفتگو جاری

ہنری روم کا خیال ہے کہ اس وقت بھی فریقین کئی نکات کی جزیات پر گفتگو جاری رکھے ہوئے ہیں۔ ان کے مطابق بات چیت پر ایران کی داخلی سیاست کا عمل دخل اور خاص طور پر سخت گیر حلقے کے مفادات بھی شامل ہو سکتے ہیں۔ روم کا مزید کہنا ہے کہ اس تناظر میں سپریم ایرانی لیڈر کے موقف کو نظر انداز کرنا مشکل ہو گا۔ ایران میں اس وقت ایسا خیال کیا جاتا ہے کہ سپریم لیڈر کی پسند کا امیدوار بغیر کسی مشکل اور عوامی مخالفت کے صدارتی الیکشن جیتنے کی پوزیشن میں ہے۔

یہ امر اہم ہے کہ سن 2015 میں جوہری معاہدہ طے ہونے پر ایرانی عوام کا جم غفیر مسرت کے اظہار کے لیے مختلف شہروں کی گلیوں اور سڑکوں پر نکل آیا تھا۔ دوسری جانب امریکی خفیہ اداروں اور انٹرنیشنل اٹامک انرجی ایجنسی کا کہنا ہے کہ سن 2003 تک ایران منظم انداز میں جوہری ہتھیار سازی کے پروگرام کو جاری رکھے ہوئے تھا۔

ع ح /  ع ا (اے پی)