بنڈس لیگا، ڈورٹمنڈ مائنز کو پچھاڑ نہ سکی

اس میچ کے بعد لیگ میں ڈورٹمنڈ کے پوائنٹس کی برتری دوسرے نمبر کی ٹیم لیورکوزن سے 10 کی ہوگئی ہے۔ اس میچ کے ابتدائی لمحات میں ڈورٹمنڈ کے دفاعی کھلاڑی Mats Hummels نے اپنی ٹیم کو برتری دلائی، جو کھیل کے 89 ویں منٹ تک قائم رہی تاہم کھیل کے اختتام سے چند لمحے قبل Petar Sliskovic نے مائنز کی طرف سے گول کر کے ڈورٹمنڈ کی تقریبا یقینی جیت کو برابری میں بدل دیا۔ اس وقت پوائنٹس ٹیبل پر ڈورٹمنڈ کی ٹیم کے 62 پوائنٹس ہیں۔ ڈورٹمنڈ کے کوچ Juergen Klopp نے میچ کے بعد اپنے ایک انٹرویو میں کہا، ’آج بہت سی چیزیں ہمارے خلاف گئیں۔ ہم نے ایک پینلٹی ضائع کی اور Barrios زخمی ہوکر میدان سے باہر گیا۔‘

واضح رہے کہ کھیل کے پہلے ہاف میں ڈورٹمنڈ کے اسٹرائیکر Barrios Lucas مائنز کے گول کیپر Christian Wetklo سے ٹکرانے کے بعد زخمی ہو گئے تھے اور انہیں میدان سے باہر جانا پڑ گیا تھا۔

دوسری جانب ہفتے کوکھیلے گئے ایک اور میچ میں دفاعی چیمپیئن بائرن میونخ نے فرائی برگ کو ایک کے مقابلے میں دو گول سے شکست دے دی۔ میونخ کی طرف سے دوسرا اور کھیل کا فیصلہ کن گول میچ کے اختتام سے کچھ دیر قبل فرانک ریبری نےکیا۔ اس فتح کے بعد میونخ کی ٹیم لیگ میں48 پوائنٹس کے ساتھ چوتھی پوزیشن پر ہے۔

ہفتے کے روز کھیلے گئے دیگر میچوں میں بریمن نے نیورمبرگ کو ایک کے مقابلے میں تین گول سے شکست دی جبکہ فرینکفرٹ اور سینٹ پاؤلی کے درمیان کھیلے گئے میچ میں فرینکفرٹ کو ایک کے مقابلے میں دوگول سے کامیابی ہوئی۔ ایک اور دلچسپ اور دھواں دھار میچ میں ہیمبرگ نےکولون کو چھ دو سے ہرا دیا جبکہ ہینوور نے ہوفن ہائم کو صفر کے مقابلے میں ایک گول سے شکست دی۔

آج اتوار کے روز دو میچز کھیلے جائیں گے۔ لیورکوزن کا میچ شالکے کے ساتھ جبکہ شٹٹ گارٹ کا مقابلہ وولفس برگ سے ہوگا۔ لیورکوزن یہ میچ جیت کر ڈورٹمنڈ کے ساتھ اپنے پوائنٹس کے فرق کو کم کر سکتی ہے۔

رپورٹ : عاطف توقیر

ادارت : عدنان اسحاق