تائیوان الیکشن: اگلے صدر چین کے ناقد امیدوار لائی ہوں گے

تائیوان کے دارالحکومت تائی پے سے مقامی وقت کے مطابق ہفتہ کی رات موصولہ رپورٹوں کے مطابق ملکی عوام نے آج کی راءے دہی میں یہ واضح فیصلہ کر دیا ہے کہ وہ چین کے ساتھ، جو تائیوان کو اپنا ایک باغی صوبہ قرار دیتا ہے، تعلقات کے بارے میں کیا سوچتے ہیں۔

تائیوان کے صدارتی اور پارلیمانی انتخابات میں ووٹنگ مکمل

اس کا ایک ناقابل تردید ثبوت یہ ہے کہ موجودہ حکمران جماعت ڈہموکریٹک پروگریسو پارٹی یا ڈی پی پی سے تعلق رکھنے والے امیدوار اور چین پر سخت تنقید کی وجہ سے مشہور سیاست دان لائی چِنگ تے نے ابتدائی غیر سرکاری نتائج کے مطابق نہ صرف یہ صدارتی الیکشن بظاہر جیت لیا ہے بلکہ ان کے دونوں بڑے حریف اپوزیشن امیدواروں میں سے ایک نے اپنی انتخابی ناکامی بھی تسلیم کر لی ہے۔

اہم بات یہ کہ بیجنگ میں چینی حکومت نے تائیوانی عوام کو آج کے الیکشن کے حوالے سے پہلے ہی خبردار کر دیا تھا کہ عوام حکومتی جماعت کے امیدوار لائی کو ووٹ نہ دیں۔ بیجنگ حکومت لائی کو 'علیحدگی پسند‘ قرار دیتی ہے۔

لائی کی طرف سے ووٹروں کا شکریہ

تائی پے سے آمدہ رپورٹوں کے مطابق ڈیموکریٹک پروگریسو پارٹی کے صدارتی امیدوار لائی چِنگ تے نے اپنی کامیابی پر تائیوان کے عوام کا شکریہ ادا کرتے ہوئے کہا ہے کہ انہوں نے اس ریاست کی تاریخ میں ایک ''نیا باب رقم کر دیا ہے۔‘‘

اپنی کامیابی کے بعد ایک خطاب میں 64 سالہ لائی نے کہا، ''ہم ان انتخابی نتائج کے ساتھ بین الاقوامی برادری کو بتا رہے ہیں کہ اگر انتخاب جمہوریت اور خود پسندانہ طرز حکومت کے مابین ہو، تو تائیوان جمہوریت کے شانہ بشانہ کھڑا ہو گا۔‘‘

'تائیوان سے چین کا دوبارہ اتحاد ناگزیر ہے'، چینی صدر

ساتھ ہی لائی نے، جن کا پور انام ولیم لائی چِنگ تے ہے، اپنے ہم وطنوں سے کہا، ''تائیوان کے عوام نے بیرونی قوتوں کی طرف سے ان انتخابات کے نتائج پر اثر انداز ہونے کی تمام کوششوں کے خلاف کامیاب مزاحمت کی ہے۔‘‘

لائی اب تک نائب صدر تھے

تائیوان کے نو منتخب صدر لائی چِنگ تے اب تک اپنی ہی پارٹی سے تعلق رکھنے والی اور اس وقت اپنے عہدے کے دوسری مدت کے لیے صدارتی منصب پر فائز خاتون سیاستدان سائی اِنگ وین کے نائب کے طور پر خدمات انجام دے رہے ہیں۔

ملکی اپوزیشن کے اپنے مرکزی حریف کی طرف سے شکست کے اعتراف کے بعد یہ بات یقینی ہے کہ آج کے الیکشن کے فاتح اور آئندہ ملکی صدر لائی چِنگ تے ہی ہوں گے۔

تائیوان کے اطراف میں چینی اقدامات سے کشیدگی میں اضافہ، جرمنی

آخری خبریں آنے تک ڈالے گئے ووٹوں کی جتنی گنتی تب تک مکمل ہو چکی تھی، ان میں سے لائی چِنگ تے 40 فیصد تک تائید کے ساتھ اپنے حریف امیدواروں سے بہت آگے تھے۔

اخبار تائی پے ٹائمز کے مطابق حکمران جماعت کے صدارتی امیدوار لائی تقریباﹰ 44 فیصد عوامی تائید کے ساتھ اپنے مخالف امیدواروں سے بہت آگے ہیں۔

عومی شرکت کا تناسب تقریباﹰ تین چوتھائی

تائیوان میں آج صدارتی کے ساتھ ساتھ پارلیمانی الیکشن بھی ہوئے، جن کے جزوی نتائج ابھی واضح ہونا شروع نہیں ہوئے۔ اس لیے یہ کہنا قبل از وقت ہو گا کہ تائی پے میں قومی پارلیمان میں اکثریت آئندہ کس پارٹی کو ملے گی۔

اس الیکشن میں تقریباﹰ 19.5 ملین ووٹروں کو اپنا حق رائے دہی استعمال کرنے کے لیے کہا گیا تھا۔ مقامی وقت کے مطابق ووٹنگ صبح آٹھ بجے شروع ہو کر سہ پہر چار بجے تک جاری رہی۔

چین نے تائیوان کے اطراف میں جنگی جہاز تعینات کر دیے

ابتدائی اندازوں کے مطابق ان انتخابات میں ووٹروں کی شرکت کا تناسب تقریباﹰ 75 فیصد رہا، جو اتنا ہی بنتا ہے، جتنا کہ اوسطاﹰ ماضی میں بھی دیکھنے میں آتا رہا ہے۔

2020ء میں ہونے والے گزشتہ الیکشن میں عوامی شرکت کا تناسب 82 فیصد سے زائد رہا تھا۔ یہ تناسب آج تک کبھی بھی دو تہائی یا 66.6 فیصد سے کم نہیں رہا۔

موجودہ خاتون صدر سائی اِنگ وین اس مرتبہ صدارتی عہدے کے لیے خود امیدوار نہیں تھیں۔ اس کی وجہ یہ ہے کہ وہ اس وقت اپنے صدارتی منصب کی دوسری مدت کے لیے فرائض انجام دے رہی ہیں اور قانون کے مطابق تیسری مرتبہ اس عہدے پر فائز نہیں ہو سکتیں۔

م م / م ا (اے ایف پی، اے پی، روئٹرز)