توہین مذہب: پاکستانی جوڑے کی سزائے موت کے خلاف اپیل مؤخر

اس مقدمے کو عدم سماعت کا سامنا اس وجہ سے رہا کہ جج صاحبان کی سیشنز کورٹ اپنے اختتام کو پہنچ گئی تھی۔ توہیںِ مذہب کے الزام میں سزا پانے والے اس جوڑے کی اپیل کی اگلی سماعت کا بھی عدالتی ججوں نے کوئی تعین نا کیا۔

اس مسیحی جوڑے کو سن 2014 میں سزائے موت سنائی گئی تھی۔ اس کے بعد سے وہ اپنی دائر کردہ اپیل کی سماعت کا منتظر ہے۔ یہ جوڑا گزشتہ قریب آٹھ برسوں سے جیل میں ہے۔

توہینِ مذہب کے ’بے بنیاد‘ الزام پر عربی کا استاد گرفتار

عدالتی سماعت

اس مقدمے کے ملزمان شگفتہ کوثر اور ان کے شوہر شفقت ایمانوئل کو موت کی سزا سن 2014 میں سنائی گئی تھی۔ ان کے وکیل سیف الملوک عدالت میں موجود تھے اور انہوں نے اپیل کے ملتوی ہونے کی تصدیق کی ہے۔

ان کا کہنا ہے کہ بظاہر ایسا تاثر ابھرا ہے کہ عدالت کے جج صاحبان اس مقدمے کی سماعت میں عدم دلچسپی رکھتے ہیں۔ اس وکیل کا مزید کہنا تھا کہ اس مناسبت سے وجوہات کا درست تعین کرنا مشکل ہے۔ سیف الملوک کے مطابق عدالت نے مقدمے کی سماعت کی اگلی تاریخ بھی مقرر نہیں کی۔

پاکستان: طالب علم اور اس کے استاد پر توہینِ مذہب کا الزام

توہین مذہب کا مبینہ واقعہ

شگفتہ کوثر اور ان کے شوہر شفقت ایمانوئل کو سن 2013 میں پولیس نے پیغمبر اسلام کی مبینہ توہین کے الزام میں حراست میں لیا تھا۔ ان پر الزام لگایا گیا تھا کہ وہ پیغمبر اسلام کے حوالے سے ایک مبینہ توہین آمیز پیغام ایک مسجد کے امام کو بھیجنے کے مرتکب ہوئے تھے۔

اس الزام کی شگفتہ کوثر اور ان کے شوہر شفقت ایمانوئل سختی سے تردید کرتے ہیں۔ مقامی ماتحت عدالت نے انہیں اس الزام میں مجرم قرار دے کر سزائے موت سنا دی تھی۔ اس سزا کے خلاف ان دونوں نے اعلیٰ عدالت یعنی لاہور ہائی کورٹ میں اپیل دائر کر رکھی ہے تا کہ ان کی سزائیں ختم کی جا سکیں۔

ایمنسٹی انٹرنیشنل کا مطالبہ

شگفتہ کوثر اور ان کے شوہر شفقت ایمانوئل کی اپیل ایک ایسے وقت پر عدم سماعت کے بعد التوا میں جا چکی ہے، جب انسانی حقوق کی بین الاقوامی تنظیم ایمنسٹی انٹرنیشنل نے عدالتی اور دیگر مجاز حکام سے درخواست کی ہے کہ اس پاکستانی مسیحی جوڑے کی رہائی کا قانونی انتظام کیا جائے۔

توہینِ مذہب کے مقدمات، اسلام آباد ہائی کورٹ کا فیصلہ تنقید کی زد میں

اس مناسبت سے ایمنسٹی کے علاقائی دفتر کی ڈائریکٹر سمیرا حمیدی کا کہنا ہے کہ پاکستان میں توہینِ مذہب کے قانون کا بلاوجہ اور غیر ضروری استعمال بے دریغ کیا جاتا ہے اور الزام سے متاثرہ افراد کو شدید کوفت، ذہنی اذیت اور سماجی پریشانی کا سامنا بھی رہتا ہے۔ حمیدی نے شگفتہ کوثر اور ان کے شوہر شفقت ایمانوئل کی سزا ختم کیے جانے کی اپیل بھی کی ہے۔

ع ح / م م (اے پی)