جنگلاتی آگ سے اٹھارہ سو فٹ بال میدانوں جتنا جرمن رقبہ تباہ

بون شہر میں قائم جرمنی کے وفاقی مرکز اطلاعات برائے زراعت بی زیڈ ایل (BZL) کی طرف سے سال 2023ء میں آتش زدگی کے باعث جنگلاتی رقبے کی تباہی سے متعلق اعداد و شمار جاری کرتے ہوئے بتایا گیا کہ پچھلے سال ملک بھر میں جنگلوں میں آگ لگ جانے کے 1059 واقعات ریکارڈ کیے گئے۔

دنیا بھر میں جنگلاتی آگ کے باعث ہلاکتیں: 2023ء اس صدی کا بدترین سال

آتش زدگی کے ان واقعات میں مجموعی طور پر 1240 ہیکٹر رقبے پر پھیلے ہوئے جنگلات جل کر تباہ ہو گئے۔ یہ رقبہ فٹ بال کے تقریباﹰ 1771 میدانوں کے برابر بنتا ہے۔

سالانہ بنیادوں پر جنگلات کی تباہی میں کمی

فیڈرل انفارمیشن سینٹر فار ایگریکلچر نے بتایا کہ 2022ء میں جرمنی کے جنگلوں میں آگ لگنے کے واقعات کی مجموعی تعداد 2397 رہی تھی اور ان میں 3058 ہیکٹر پر پھیلے ہوئے جنگلات تباہ ہو گئے تھے۔

اس طرح پچھلے سال اس سے بھی ایک برس قبل کے مقابلے میں جرمنی کے جنگلوں میں لگنے والی آگ کے واقعات کی تعداد اور اس وجہ سے تباہ ہو جانے والا جنگلاتی رقبہ دونوں ہی نصف سے بھی کم ہو گئے۔

ایک اہم بات یہ بھی ہے کہ بون میں قائم بی زیڈ ایل کی طرف سے جرمن جنگلات میں لگنے والی آگ کے واقعات کی تعداد اور ان میں تباہ ہو جانے والے رقبے کا طویل عرصے سے سالانہ بنیادوں پر باقاعدہ ریکارڈ رکھا جاتا ہے اور سالانہ اوسط بھی نکالی جاتی ہے۔

یورپی یونین کا ہنگامی خدمات مرکز کیسے کام کرتا ہے؟

پچھلے کئی سالو‌ں سے یہ اوسط آتش زدگی کے 1157 واقعات اور 859 ہیکٹر رقبہ بنتی ہے۔ 2023ء کا ڈیٹا تاہم اس لیے قابل ذکر ہے کہ گزشتہ برس جنگلوں میں آگ لگنے کے واقعات کی تعداد ان کی سالانہ اوسط سے تقریباﹰ 100 کم رہی۔ لیکن ان واقعات میں تباہ ہونے والا جنگلاتی رقبہ اوسط سے قریب 44 فیصد زیادہ رہا۔

زیادہ واقعات کب اور کہاں پیش آئے؟

گزشتہ برس جرمن جنگلوں میں آگ لگنے کے زیادہ تر واقعات گرمیوں میں مئی سے لے کر جولائی تک کے مہینوں میں پیش آئے۔ سال بھر کے دوران ایسے واقعات کی کُل تعداد کا 85 فیصد موسم گرما کے انہی تین مہینوں میں ریکارڈ کیا گیا۔

اسپین میں پگھلا دینے والی گرمی: آگ کے شعلے، پیاس، بے ہوشی

اسی طرح سال بھر کے دوران جل کر تباہ ہو جانے والے جنگلاتی رقبے کا نصف سے بھی زائد صرف مئی کے مہینے میں برباد ہوا۔

بی زیڈ ایل نے بتایا کہ پچھلے سال جرمنی کے کُل 16 وفاقی صوبوں میں سے جس ایک صوبے میں سب سے زیادہ جنگلاتی آتش زدگی دیکھنے میں آئی، وہ ملک کے مشرق میں برلن کا ہمسایہ وفاقی صوبہ برانڈن بُرگ تھا۔ وہاں زمین قدرے ریتلی ہے اور زیادہ تر جنگلات صنوبر کے ہیں، جو مقابلتاﹰ آسانی سے آگ پکڑ لیتے ہیں۔

نیدرلینڈز کے رقبے کے برابر بارانی جنگلات جلا یا کاٹ دیے گئے

2023ء میں جنگلاتی آگ سے سب سے زیادہ متاثرہ جرمن صوبوں میں برانڈن بُرگ کے بعد دوسرے اور تیسرے نمبر پر میکلن بُرگ بالائی پومیرانیا اور سیکسنی رہے۔

م م / ا ا (ڈی پی اے)