جرمنی کا مشرقی حصہ ابھی تک اقتصادی ماضی کے چنگل ميں

سابق مشرقی جرمنی اور مغربی جرمنی کے اتحاد کے بعد مشرقی جرمنی ميں بھی وفاقی نظام رائج ہوا اور اس کے نتيجے ميں جو وفاقی صوبے وجود ميں آئے اُنہيں مغربی جرمنی کے پہلے سے موجود وفاقی صوبوں کے مقابلے ميں ملک کے نئے وفاقی صوبے کہا جاتا ہے۔

بعض تجزيہ نگاروں کا کہنا ہے کہ ان مشرقی جرمن صوبوں کی اقتصاديات ميں اس سال 2.5 فيصد کی نمو ہوگی۔ يہ صوبے اپنی معيشت کو لگنے والے تازہ ترين دھچکے، يعنی عالمی اقتصادی بحران سے نکلنے کی کوشش ميں مصروف ہيں۔

اس کے باوجود ملک کے مشرقی حصے کے شہريوں کا گلہ ہے کہ اُن کی پينشنيں اور تنخواہيں، مغربی حصے کے شہريوں کے مقابلے ميں کم ہيں حالانکہ ملک کے دونوں حصوں ميں روزمرہ اخراجات زندگی يکساں ہيں۔ مشرقی جرمن وفاقی صوبے سکسنی ان ہالٹ کے ايک ٹريڈ يونين سربراہ اُڈُو گيب ہارڈ نے کہا: " اتحاد کے 25 سال بعد اب ملک کے مشرقی اور مغربی حصوں کے درميان اجرتوں کے فرق کو بہت سی صورتوں ميں جائز کہنا ممکن نہيں رہا۔ "

اس کے علاوہ بہت سے ماہرين اقتصاديات کا کہنا ہے کہ سابق چانسلر کول نے سن 1990 ميں متحدہ جرمنی کے پہلے انتخابات ميں جن سرسبزو شاداب اور لہلہاتے ہوئے کھیتوں اور شاندار علاقوں کا وعدہ کيا تھا اُن کی تکمیل ميں ابھی کم ازکم ايک عشرہ اور لگے گا۔ بہت سے سرکاری حکام اور عہديداروں نے مشرقی جرمنی کی تعمير نو کے کام کی شدت اور اخراجات کا بہت غلط اندازہ لگايا تھا۔

آج بھی صرف چند ہی کمپنيوں کے ہيڈ کوارٹر ملک کے مشرقی حصے ميں ہيں اور وہاں کم ہی چھوٹے اور درميانے درجے کی کمپنيوں نے کسی بڑی توسيع ميں کاميابی حاصل کی ہے۔ يہ اس کے باوجود ہے کہ بعض بڑی کمپنيوں، مثلاً موٹر کمپنيوں بی ايم ڈبليو اور پورشے اور چپ تيار کرنے والی فرم ان فائن آن نے مشرق ميں ايک بڑے پيمانے پر سرمايہ کاری کی ہے۔

اس کے علاوہ ہر جرمن ٹيکس دہندہ پر جرمن اتحاد کے اخراجات پورا کرنے کے لئے جو 5.5 فنصد کا ٹيکس لگايا گيا تھا وہ ملک کی اقتصادیات کے لئے ايک بوجھ ثابت ہورہا ہے اور اس کی وجہ سے نجی صرف ميں کمی ہوگئٍ ہے۔

مشرقی جرمنی کی، اپنے اقتصادی ماضی کو الوداع کہنے کی جنگ، تيزی سے برپا ہونے والی عالمگيريت کی وجہ سے دشوار تر ہوگئی ہے۔ عالمگيريت اُس وقت واضح طور پر پوری قوت سے پھيلنا شروع ہوگئی تھی جب سابق کميونسٹ مشرقی جرمنی عالمی اقتصادی اسٹيج پر قدم جمانے کی ابتدائی کوششوں ميں مصروف تھا۔