دوسرا ٹی ٹوئنٹی: پاکستان کے ہاتھوں زمبابوے کو تاریخی شکست

پاکستان نے میزبان زمبابوے کو ٹی ٹوئنٹی میچوں میں اس کے اب تک کے کم ترین اسکور پر ڈھیر کرتے ہوئے دس وکٹوں سے شکست دے دی۔ منگل کو زمبابوے کے شہر بلاوایو میں تین ٹی ٹوئنٹی میچوں کی سیریز کے دوسرے میچ  میں میزبان ٹیم پہلے کھیلتے ہوئے12.4 اوورز میں 57 رنز پر ڈھیر ہو گئی۔

یہ زمبابوے کا بین الاقوامی ٹی 20 میچوں میں آج تک کا سب سے کم مجموعی اسکور ہے۔ اس سے قبل اس ٹیم نے اسی سال جنوری میں سری لنکا کے خلاف کھیلتے ہوئے 84 رنز بنائے تھے۔

پاکستانی اسپنر سفیان مقیم نے 2.4 اوورز میں محض تین رنز دے کر پانچ وکٹیں لیں اور یوں اپنے کیریئر کی بہترین کارکردگی کا مظاہرہ کیا اور میچ کے بہترین کھلاڑی کا ایوارڈ بھی حاصل کیا۔ میزبان ٹیم کی طرف سے برائن بینیٹ (21) اور تادیواناشے مارومانی (16) نے 27 گیندوں پر 37 رنز بنائے، لیکن اس کے بعد زمبابوے کی ٹیم صرف 20 رنز کے اضافے پر تمام 10 وکٹیں گنوا بیٹھی۔ بائیں ہاتھ کے پاکستانی اسپنر سفیان مقیم نے زمبابوے کی بیٹنگ کا مڈل آڈر تباہ کر دیا۔

پاکستان نے جوابی بیٹنگ کرتے ہوئے بغیر کسی وکٹ کے نقصان کے با آسانی اپنا ہدف اس وقت پورا کر لیا جب اس کی اننگز کی ابھی 87 گیندیں باقی تھیں۔ اوپنر صائم ایوب نے 18 گیندوں پر 36 اور عمیر یوسف نے 15 گیندوں پر 22 رنز بنائے۔

یہ میچ میں کامیابی کے بعد باقی بچ جانے والی گیندوں کے اعتبار سے پاکستان کی ٹی ٹوئنٹی انٹرنیشنل میچوں میں آج تک کی سب سے بڑی جیت ہے۔ پاکستان نے اس سیریز کا پہلا میچ بھی 57 رنز سے جیت لیا تھا۔

یوں تین میں سے دو میچ جیت کر پاکستانی ٹیم یہ سیریز پہلے ہی جیت چکی ہے جبکہ سیریز کا تیسرا اور آخری میچ جمعرات کو بلاوایو میں ہی  کھیلا جائے گا۔

ش ر⁄ م م (روئٹرز)