سالگرہ پر سب کے لیے مفت کوکین، جرمن خاتون گرفتار

نیوز ایجنسی اے ایف پی نے آج جمعے کے روز وفاقی دارالحکومت سے اپنی رپورٹوں میں بتایا کہ شہری ریاست برلن کی پولیس کے مطابق اس خاتون کو جمعرات چھ فروری کو حراست میں لیا گیا اور وہ ابھی تک پولیس کی تحویل میں ہے۔

اس خاتون نے فیصلہ کیا تھا کہ وہ اپنی 76 ویں سالگرہ اس طرح منائے گی کہ اس کی ملکیت شراب خانے میں آنے والا ہر مہمان اور گاہک، اگر وہ چاہے تو، بلا قیمت کوکین کا نشہ کر سکتا ہے۔ جب اس خاتون نے اپنے اس ارادے کو جمعرات کی شام عملی جامہ پہنانا شروع کیا، تو کچھ ہی دیر بعد کسی نے پولیس کو خبر کر دی کہ اس بار میں مہمانوں کو غیر قانونی ڈرگ دل کھول کر پیش کی جا رہی ہے۔

پولیس کے ایک ترجمان کے بقول یہ اطلاع ملنے پر جمعرات کی رات چھاپہ مار کر نہ صرف اس خاتون کو گرفتار کر لیا بلکہ اس وقت اس کی بار میں بہت سے افراد ایسے بھی تھے، جنہوں نے کوکین کا نشہ کر رکھا تھا۔

پولیس ذرائع نے جرمن قوانین کے مطابق ملزمہ کا نام نہیں بتایا لیکن یہ تصدیق کر دی کہ ابتدائی تفتیش کے مطابق جن افراد کو اس کی بار میں نشے کی حالت میں پایا گیا، انہیں کوکین اسی خاتون نے فراہم کی تھی۔

اسی خاتون کو پولیس نے چند ہفتے پہلے جنوری کے آخر میں بھی گرفتار کیا تھا۔ تب پولیس کو اس کی بار اور فلیٹ سے مجموعی طور پر 35 گرام کوکین ملی تھی۔ اس واقعے میں ملزمہ ابھی یکم فروری ہفتے کے روز ہی ضمانت پر رہا ہوئی تھی۔

اپنی سالگرہ کی پارٹی میں ہر خاص و عام کو مفت کوکین پیش کرنے والی اس خاتون کو پولیس نے اس مرتبہ صرف گرفتار ہی نہیں کیا بلکہ اس کا شراب خانہ بھی بند کر دیا گیا ہے۔