مہینہ بھر پورے جرمنی کا سفر، انچاس یورو ٹکٹ کی فروخت شروع

گزشتہ برس موسم گرما میں ایسی ہی صرف نو یورو کی ٹکٹ کے تین ماہ کے لیے متعارف کردہ منصوبے کی قومی سطح پر زبردست کامیابی کے بعد اور ملک میں مسلسل بہت زیادہ مہنگائی اور توانائی کی قیمتوں میں ہوش ربا اضافے کے پیش نظر اس بارے میں جرمنی میں وفاقی اور تمام سولہ صوبائی حکومتوں کے مابین گزشتہ کئی ماہ سے مذاکرات جاری تھے کہ عوام کو آئندہ بھی دیرپا بنیادوں پر پورے ملک میں پبلک ٹرانسپورٹ کے ذریعے سستے سفر کے پرکشش امکانات مہیا کیے جانا چاہیں۔

پورے جرمنی کے لیے نو یورو ماہانہ کی ٹرین ٹکٹ بہت کامیاب رہی

اب یہ کوششیں بالآخر نتیجہ خیز ثابت ہوئی ہیں اور آج تین اپریل سے عام صارفین صرف 49 یورو فی کس کے عوض ایسی ماہانہ ٹکٹیں خرید سکتے ہیں، جن کے ذریعے سفر یکم مئی سے ممکن ہو سکے گا۔ ایسا اس لیے کیا گیا ہے کہ یہ منصوبہ عملی طور پر یکم مئی سے ہی شروع ہو گا مگر صارفین چاہیں تو ایسی 'انچاس یورو ٹکٹ‘ ایڈوانس میں بھی خرید سکتے ہیں۔

پورے ملک میں لامحدود سفر

ایسی کسی بھی ٹکٹ کا حامل کوئی بھی مسافر پورے ملک میں علاقائی سطح کی پبلک ٹرانسپورٹ استعمال کرتے ہوئے لامحدود سفر کر سکے گا۔ اس کا مطلب یہ ہے کہ صارفین تیز رفتار انٹرسٹی اور انٹرسٹی ایکسپریس ٹرینیں چھوڑ کر باقی ہر قسم کی ریل گاڑیاں، بسیں، ٹرامیں اور زیر زمین ٹرام سسٹم جتنا چاہیں استعمال کر سکیں گے۔

جرمنی کی سب سے بڑی ریل کمپنی ڈوئچے بان کی ایک ترجمان کے مطابق اس ٹکٹ کی فروخت عوام میں اس لیے بھی بہت مقبول رہے گی کہ آج پیر تین اپریل کو اس کی آن لائن فروخت شروع ہوتے ہی ڈوئچے بان اور بیسیوں علاقائی ٹرانسپورٹ کمپنیوں کی ویب سائٹس پر ٹکٹیں خریدنے والے صارفین کی تعداد معمول سے دو گنا سے بھی زیادہ رہی۔

چپ کارڈ یا موبائل فون پر ٹکٹ

یہ ٹکٹ الیکٹرانک چپ والے ایک ٹریول کارڈ کے طور پر بھی خریدی جا سکتی ہے اور موبائل فون پر ایک ڈیجیٹل ٹکٹ کی صورت میں بھی۔ اس کی خرید تاہم سالانہ بنیادوں پر ممکن ہو سکے گی اور صارفین کو ہر ماہ اس کے لیے، جیسا کہ نام سے بھی ظاہر ہے، صرف 49 یورو ادا کرنا ہوں گے۔

جرمنی اور پولینڈ کو جوڑنے والی’کلچر ٹرین‘

یہ منصوبہ جرمنی کی موجودہ مخلوط حکومت نے تمام صوبائی حکومتوں کے ساتھ مل کر اور اربوں یورو کی سبسڈی کے ساتھ عوامی فلاح کے لیے شروع کیا ہے، اس لیے یہ ایک دیرپا منصوبہ ہو گا۔ عبوری انتظامات کے تحت یہی ٹکٹ کسی بھی ٹکٹ مشین سے سال رواں کے آخر تک چپ کارڈ اور موبائل ٹکٹ کے ساتھ ساتھ پیپر ٹکٹ کی صورت میں بھی خریدی جا سکتی ہے۔

یہ ٹکٹ کتنے صارفین خریدیں گے؟

اس ٹکٹ کے بہت سستے ہونے کی وجہ سے ملک بھر کی ٹرانسپورٹ کمپنیوں اور اداروں کو ان کی آمدنی میں جتنا نقصان ہو گا، وفاقی اور صوبائی حکومتوں کے مابین طے پانے والے اتفاق رائے کے مطابق اس نقصان کا آدھا حصہ وفاقی اور صوبائی حکومتیں مل کر اپنی طرف سے سسبڈی کے طور پر ادا کریں گی۔

یورپ بھر کی سیر بذریعہ ٹرین: انٹر ریل کے پچاس سال

اس وقت جرمنی میں پبلک ٹرانسپورٹ کے ذریعے روزانہ یا ہفتے میں کئی دن مگر باقاعدگی سے سفر کے لیے سالانہ بنیادوں پر ٹکٹیں خریدنے والے صارفین کی مجموعی تعداد تقریباﹰ 11 ملین بنتی ہے۔

جرمن ٹرانسپورٹ کمپنیوں کی ملکی تنظیم کے مطابق ماہرین کا اندازہ ہے کہ یہ نئی سستی ٹکٹ اتنی زیادہ پسند کی جائے گی کہ اس کے لیےتقریباﹰ 5.6 ملین نئے صارفین بھی اپنے اپنے علاقوں کی ٹرانسپورٹ کمپنیوں کے ساتھ معاہدے کرتے ہوئے ماہانہ بنیادوں پر یہ ٹکٹ ملک بھر میں استعمال کیا کریں گے۔

م م / ع ا (ڈی پی اے)