عمران خان اور بشریٰ بی بی کے خلاف نئے الزامات

گزشتہ اتوار کو سابق وزیر اعظم عمراں خان کی اہلیہ بشریٰ بی بی کی قیادت میں ملک کے شمال مغربی صوبے خیبر پختونخوا سے ہزاروں افراد نے وفاقی دارالحکومت اسلام آباد کی طرف مارچ کیا تاکہ خان کی رہائی کا مطالبہ کیا جا سکے، جو اگست 2023 سے سلاخوں کے پیچھے ہیں۔

 عمران خان کے خلاف پہلے ہی 150 سے زائد مقدمات درج ہیں لیکن تحریک انصاف کے حامیوں کا کہنا ہے کہ یہ تمام تر مقدمات سیاسی نوعیت کے ہیں اور انہیں جان بوجھ کر نشانہ بنایا جا رہا ہے۔

پولیس نے منگل کی رات ان مظاہرین کو منتشر کرنے کے لیے جب پرتشدد کارروائی کی، تو بشریٰ بی بی اسلام آباد سے نکلنے میں کامیاب رہیں۔ وہ بدعنوانی کے ایک مقدمے میں ضمانت پر جیل سے باہر ہیں اور احتجاج کی قیادت کرتے ہوئے دارالحکومت پہنچی تھیں۔

’اسلام آباد سے واپس جا کر بھی پی ٹی آئی خاموش نہیں بیٹھے گی‘

حکام نے بتایا ہے کہ اتوار سے لے کر اب تک اسلام آباد اور اس کے گرد و نواح سے تقریباً 1000 مظاہرین کو گرفتار  کیا جا چکا ہے۔ اس احتجاج کے دوران اب تک چار سکیورٹی اہلکاروں سمیت کم از کم چھ افراد کے ہلاک ہونے کی مصدقہ اطلاعات ہیں۔ اسلام آباد پولیس نے ان ہلاکتوں کا ذمہ دار عمران خان کے حامیوں کو ٹھہرایا ہے۔

اسی تناظر میں آج بروز جمعرات پولیس نے اسلام آباد اور راولپنڈی میں عمران خان، بشریٰ بی بی اور دیگر رہنماؤں کے خلاف پاکستان کے انسداد دہشت گردی قوانین کے تحت نئے الزامات جاری کیے۔

صحافی مطیع اللہ جان کی گرفتاری اور دہشت گردی کا الزام

حکام نے ان پر عوام کو سکیورٹی فورسز پر حملہ کرنے کے لیے اکسانے اور امن کو خراب کرنے جیسے الزامات عائد کیے ہیں۔ دوسری جانب پاکستان تحریک انصاف یا پی ٹی آئی کا کہنا ہے کہ وہ عمران خان کی رہائی کے لیے کوششیں جاری رکھے گی۔

'دارالحکومت پر قبضہ کرنا چاہتے تھے‘

جمعرات کو ہی منصوبہ بندی اور ترقی کے وفاقی وزیر احسن اقبال اور وزیر اطلاعات عطا اللہ تارڑ نے بین الاقوامی میڈیا کو بتایا کہ خان کے حامی ''دارالحکومت پر قبضہ کرنا چاہتے تھے‘‘ اور ان میں سے کچھ کے پاس ہتھیار تھے۔

ان حکومتی عہدیداروں کا کہنا تھا کہ یہ ہتھیار اس وقت ضبط کیے گئے، جب آدھی رات کو سکیورٹی فورسز کی کارروائی جاری تھی۔

احسن اقبال نے کہا کہ سکیورٹی فورسز نے ہجوم کو منتشر کرنے کے لیے صرف آنسو گیس اور لاٹھیوں کا استعمال کیا۔ انہوں نے پی ٹی آئی کے اس دعوے کو بھی مسترد کر دیا کہ عمران خان کے کچھ حامی پولیس کی فائرنگ سے ہلاک ہوئے۔

سن 2022 میں عمران خان کی حکومت کے خاتمے کے بعد سے یہ ملک کو ہلا دینے والا تازہ ترین احتجاجی مظاہرہ تھا۔ نیوز ایجنسی اے پی کے مطابق حالیہ سیاسی تناؤ کے باعث پاکستان اسٹاک مارکیٹ کو1.7 بلین ڈالر سے زائد کا نقصان ہوا لیکن جمعرات کو پہلی بار ملکی سٹاک انڈکس 100,000 پوائنٹس کی حد عبور کر گیا۔ وزیر اعظم شہباز شریف نے کہا ہے کہ سٹاک مارکیٹ کی یہ کارکردگی ملکی معیشت میں بہتری کی علامت ہے۔

ا ا / م م (اے پی)