عمران خان کامیاب رہیں، انگیلا میرکل کی خواہش

خبر رساں ادارے ڈی پی اے نے اٹھارہ اگست بروز ہفتہ بتایا ہے کہ جرمن چانسلر انگیلا میرکل نے عمران خان کی حالیہ الیکشن میں کامیابی اور وزیر اعظم کا منصب سنبھالنے پر تہینتی پیغام ارسال کیا ہے۔ میرکل کی طرف سے ارسال کیے گئے اس پیغام میں امید ظاہر کی گئی ہے کہ عمران خان بطور وزیرا عظم پاکستان کی ترقی میں اہم کردار ادا کریں گے۔

انگیلا میرکل نے کہا کہ وہ خواہش کرتی ہیں کہ بطور وزیرا عظم عمران خان بااعتماد فیصلے کریں گے اور وہ کامیاب رہیں گے۔ میرکل نے مزید کہا کہ وہ یہ امید بھی کرتی ہیں کہ پاکستان کے نئے سربراہ حکومت ہمسایہ ممالک کے ساتھ پر امن مذاکرات کریں گے اور خطے میں قیام امن کے لیے اپنا فعال کردار ادا کریں گے۔

میرکل نے اپنے اس پیغام میں مزید کہا کہ برلن حکومت پاکستان کی اقتصادی ترقی میں اس کے ساتھ ہو گی۔ پاکستان کو اس وقت شدید مشکلات کا سامنا ہے اور اقتصادی ماہرین کے مطابق عمران خان کو حکومت سنبھالنے کے بعد عالمی مالیاتی ادارے سے رجوع کرنا ہی پڑے گا۔

جرمن چانسلر انگیلا میرکل نے اس پیغام میں مزید کہا کہ ان کی حکومت دہشت گردی کے خلاف جاری جنگ میں بھی پاکستان کو ہر ممکن تعاون فراہم کرے گی۔ ساتھ ہی انہوں نے یہ بھی کہا کہ پاکستان میں جمہوری اداروں کو مضبوط بنانے کے لیے ان کی حکومت اسلام آباد کے ساتھ ہو گی۔

پاکستان میں تعینات جرمن سفیر مارٹن کوبلر نے بھی عمران خان کو مبارکباد دی ہے۔ انہوں نے اپنے ایک ٹوئٹ میں کہا کہ وہ ان کی حکومت کے ساتھ بھرپور تعاون کریں گے اور امید کرتے ہیں کہ عمران خان پاکستان اور خطے میں استحکام اور خوشحالی کا باعث بنیں گے۔

65 سالہ عمران خان کی بائیس سالہ سیاسی جدوجہد کے بعد ان کی سیاسی جماعت پاکستان تحریک انصاف پچیس جولائی کے الیکشن میں سب سے بڑی سیاسی طاقت بن کر ابھری تھی لیکن خان کی پارٹی کو حکومت سازی کی لیے درکار قطعی اکثریت حاصل نہ ہو سکی تھی۔

اس لیے عمران خان نے حکومت سازی کے لیے آزاد امیداروں اور دیگر چھوٹی پارٹیوں کے ساتھ اتحاد کیا۔ ناقدین کا کہنا ہے کہ عمران خان کو اقتدار سنبھالتے ہی چند بڑے چیلنجز کا سامنا ہو گا، جن میں اقتصادی مسائل اور ملک میں بڑھتی ہوئی انتہا پسندی نمایاں ہیں۔

ع ب / ع ت / خبر رساں ادارے