قبرص: ’سرمایہ کاری کے ذریعے شہریت‘ پروگرام کی معطلی کا فیصلہ

منگل کو قبرص کے دارالحکومت نکوسیا میں حکومت کی طرف سے کہا گیا کہ اس پروگرام کی معطلی کا فیصلہ ایسی کئی رپورٹیں منظر عام پر آنے کے بعد کیا گیا، جن کے تحت اس قانون میں کچھ نقائص موجود تھے اور اس کا غلط استعمال بھی کیا جا رہا تھا۔

ملک کی نیم سرکاری نیوز ایجنسی نے ایک حکومتی ترجمان کے بیان کا حوالہ دیتے ہوئے کہا کہ 'سرمایا کاری کے ذریعے ملکی شہریت‘ کے اس متنازعہ پروگرام پر عمل درآمد یکم نومبر سے معطل کر دیا جائے گا۔ یہ فیصلہ اس یورپی جزیرہ ریاست کی کابینہ کے ایک ہنگامی اجلاس میں کیا گیا۔

آڈٹ آفس کے اعتراضات

گزشتہ ہفتے قبرص کے آڈٹ آفس نے  قومی پارلیمان سے مطالبہ کیا تھا کہ وہ ایسے افراد کو قبرصی پاسپورٹ دینے کا سلسلہ رکوائے، جو ہوتے تو بہت امیر سرمایہ کاروں کے اہل خانہ ہیں مگر جنہوں نے خود وہاں کی معیشت کو ایک یورو کا بھی فائدہ نہیں پہنچایا ہوتا۔

قبرصی آڈٹ آفس کے مطابق 2013ء میں یہ قانون متعارف کرائے جانے سے لے کر اب تک حکومت ہزاروں امیر سرمایہ کاروں کے اہل خانہ کو شہری حقوق دے چکی ہے، حالانکہ جس وقت یہ قانون منظور کیا گیا تھا، اس وقت حکومت کو ایسا کرنے کا قانونی اختیار حاصل نہیں تھا۔ اس سے متعلق ترمیمی قانون پارلیمان سے اسی سال منظور کیا گیا۔

اب تک کتنے سرمایہ کاروں نے شہریت حاصل کی؟

اعداد و شمار کے مطابق جب سے حکومت نے یہ قانون منظور کیا ہے، تب سے ہزاروں غیر ملکی سرمایہ کاروں کو قبرصی پاسپورٹ جاری کیے جا چکے ہیں۔ ان پاسپورٹوں کے ذریعے ایسے افراد 27 رکنی یورپی یونین کے تمام ممالک تک باآسانی سفر اور مخصوص حالات میں وہاں قیام اور رہائش کے حقوق بھی حاصل کر لیتے ہیں۔

نکوسیا حکومت اب تک تقریباﹰ چار ہزار غیر ملکی سرمایا کاروں کو یورپی یونین کے پاسپورٹ جاری کر چکی ہے، جس سے حکومت کو سات بلین یورو (8.15 بلین ڈالر) کی آمدنی ہوئی۔

اب بھی سینکڑوں درخواستیں زیر غور

سرمایا کاری کے ذریعے قبرص کی شہریت کے حصول کے لیے جن غیر ملکیوں کی درخواستیں مئی 2018ء سے اب تک زیر غور ہیں، ان کی تعداد 635 بنتی ہے۔

قبرصی انویسٹمنٹ پروگرام کے تحت حکومت نے پیشکش کی تھی کہ یورپی یونین سے باہر کا کوئی سرمایا کار اگر اس ملک میں ڈھائی ملین یورو (2.9 ملین ڈالر) کے برابر سرمایا کاری کرے گا تو اسے قبرصی شہریت دے دی جائے گی۔

درخواست دہندگان میں مجرم اور مشکوک شخصیات بھی

نکوسیا حکومت کا یہ پروگرام اس وجہ سے بھی متنازعہ ہو گیا کہ حکومتی چھان بین سے یہ پتا چلا تھا کہ کئی درخواست دہندگان ایسے تھے، جو اس طرح یورپی پاسپورٹ کے مستحق ہو ہی نہیں سکتے تھے۔

مثلاﹰ ان میں سے ایک سرمایا کار ایسا تھا جس پر یورپی یونین نے پابندیاں لگا رکھی تھیں۔ ایک دوسرے درخواست دہندہ کے خلاف اس کے آبائی ملک میں مالیاتی جرائم کے الزام میں بین الاقوامی پولیس انٹرپول کی تفتیش جاری تھی۔

اس کے علاوہ کئی درخواست دہندگان کی قبرصی پاسپورٹ کے لیے درخواستیں اس لیے مسترد کر دی گئی تھیں کہ ان پر منی لانڈرنگ، جعلسازی، ٹیکس چوری یا رشوت خوری کا شبہ تھا۔

م م /  ش ج (روئٹرز، اے پی)