قزاقستان الیکشن، توقایف نے میدان مار لیا

خبر رساں ادارے روئٹرز نے قزاقستان کے الیکشن کمیشن کے حوالے سے پیر کے دن ابتدائی نتائج کا اعلان کرتے ہوئے بتایا کہ قاسم جومارت توقایف نے صدارتی الیکشن میں 71 فیصد ووٹ حاصل کیے ہیں۔ اتوار کو منعقد ہوئے اس انتخابی عمل میں قاسم کا مقابلہ چھ  امیدواروں سے تھا۔ تاہم یہ تمام ملکی ووٹرز کے لیے نئے چہرے تھے۔

اس الیکشن کے دوران ہی اپوزیشن نے احتجاج کرتے ہوئے انتخابی عمل کو 'غیرمنصفانہ‘ قرار دے دیا تھا۔ الیکشن کے دن ہی مظاہرے کیے گئے، جس کے جواب میں سکیورٹی فورسز نے کارروائی کرتے ہوئے پانچ سو مظاہرین کو حراست میں بھی لے لیا تھا۔ یہ امر اہم ہے کہ وسطی ایشیا کی اس ریاست میں عوام کو آزادی اظہار میں کئی طرح کی رکاوٹوں کا سامنا ہے۔

مقامی میڈیا کے مطابق پیر کے دن بھی الماتی میں مظاہرے کیے گئے لیکن اتوار کے مقابلے میں مظاہرین کی تعداد کافی کم رہی۔ قزاقستان کی ریاست ملکی سیاست اور عوامی مباحث پر سخت کنٹرول رکھتی ہے۔ زیادہ تر ملکی میڈیا ہاؤسز نذربائیف پر تنقید سے اجتناب کرتے ہیں جبکہ اتوار کے دن ملک میں سوشل میڈیا اور آن لائن پلیٹ فارمز کو بلاک کر دیا گیا تھا۔

یورپی تنظیم برائے تعاون اور سکیورٹی OIC کے مبصرین پیر کی شب تک اس الیکشن پر اپنا تبصرہ جاری کر دیں گے۔ یاد رہے کہ یہ تنظیم ماضی میں کہہ چکی ہے کہ قزاقستان میں انتخابی عمل نہ تو شفاف ہوتا ہے اور نہ ہی منصفانہ۔

سابق صدر نذربائیف تیل سے مالا مال اس ملک پر گزشتہ تیس برسوں سے حکمرانی کر رہے تھے۔ 78 سالہ نذربائیف  نے مارچ میں اپنے عہدے کو خیر باد کہہ دیا تھا۔ تاہم انہوں نے مستعفی ہونے سے قبل اپنے قریبی ساتھی توقایف کو صدر کے عہدے کے لیے منتخب کیا تھا۔

صدر کے عہدے سے الگ ہونے کے باوجود نذربائیف ملک کی ایک طاقتور ترین سیاسی شخصیت قرار دیے جاتے ہیں۔ ان پر انسانی حقوق کی شدید خلاف ورزیوں کے الزامات بھی عائد کیے جاتے ہیں۔

مارچ میں ہی نذربائیف نے سینیٹ کی اسپیکر کے طور پر اپنی بیٹی کا انتخاب کیا تھا۔ قبل ازیں اس اہم عہدے پر اتوار کے الیکشن میں کامیاب ہونے والے توقایف براجمان تھے۔ ملک کے کئی اہم عہدوں پر نذربائیف کے قریبی رشتہ دار یا ساتھی تعینات ہیں۔

دوسری طرف ہمسایہ ریاستوں ازبکستان اور کرغزستان کے صدور نے الیکشن میں کامیابی حاصل کرنے پر قاسم جومارت توقایف کو مباکبادی پیغامات ارسال کیے ہیں۔ توقایف کی ویب سائٹ پر جاری کیے گئے ایک بیان میں کہا گیا ہے کہ ملک کی ترقی کی خاطر تمام عوام کو متحد ہو کر کام کرنا ہو گا۔