ماحولیاتی تبدیلیوں کے ذمہ دار صنعتی ممالک ہیں، میرکل

بدھ 23 جنوری کو سوئس شہر داووس میں عالمی اقتصادی فورم کے شرکاء سے خطاب میں چانسلر میرکل نے کہا کہ وہ اس بات پر مکمل یقین رکھتی ہیں کہ ماحولیاتی تبدیلیاں انسانی بقا کے لیے ایک بڑا خطرہ ہیں اور اس کے لیے مشترکہ اقدامات کی ضرورت ہے۔

ورلڈ اکنامک فورم 2019: ٹرمپ، مے اور ماکروں غیر حاضر

جرمن سیاستدانوں سے ناراض ہیکر نے ان کا پرسنل ڈیٹا لیک کر دیا

انہوں نے کہا کہ صنعتی ممالک اس بات کی اہلیت بھی رکھتے ہیں اور ذمہ داری بھی کہ وہ ایسی ٹیکنالوجیز تیار کریں، جو دوسروں کے لیے بھی فائدہ مند ہوں۔ میرکل کا کہنا تھا کہ جرمنی ماحولیاتی تبدیلیوں کے تدارک کے لیے کام کرتے ہوئے اپنے ہاں کوئلے سے بجلی کی پیداوار کو بند کر رہا ہے اور اس کا انحصار اب گیس پر بڑھ رہا ہے۔

میرکل کا کہنا تھا کہ جرمنی میں گیس کی ضروریات کو پورا کرنے کے لیے روس سے گیس حاصل کی جا رہی ہے، جب کہ مائع گیس کی ترسیل امریکا اور دیگر ممالک سے ہو گی: ’’اگر ہم کوئلے کے کارخانے بند کر رہے ہیں، جوہری کارخانے بند کر رہے ہیں، تو ہمیں عوام سے سچ بولتے ہوئے انہیں بتانا چاہیے کہ ہمیں مزید قدرتی گیس درکار ہو گی۔‘‘

چانسلر میرکل نے کہا کہ ماحولیاتی تبدیلیوں کے انسداد کے لیے کثیرالقومی اشتراکِ عمل کی ضرورت ہے، کیوں کہ دوسری صورت میں کسی ایک ملک کے اقدامات کا کوئی فائدہ نہیں ہو گا۔ میرکل نے اپنے خطاب میں آبادی میں اضافے پر بھی بات کی اور کہا کہ عالمی سطح پر بڑے مسائل کے حل کے لیے مشترکہ اقدامات مؤثر ہوں گے: ’’ہمیں ایک واضح اور شفاف عزم کی ضرورت ہے، جو کثیرالقومی ہو۔ اس کے علاوہ کوئی بھی راستہ فقط مشکل ہو گا۔‘‘

امریکا کا نام لیے بغیر میرکل نے کہا، ’’ہمیں اپنے قومی مفادات کا خیال رکھنا ہے، مگر دوسروں کا بھی سوچنا ہے۔‘‘

اس موقع پر جاپانی وزیراعظم شینزو آبے نے بھی امریکی صدر ٹرمپ کی عوامیت پسند پالیسیوں سے دوری اختیار کرتے ہوئے کہا، ’’جاپان کا عزم ہے کہ وہ آزاد، کھلی اور ضوابط کی حامل بین الاقوامی نظام کا ساتھ دے۔‘‘

ع ت، الف ب الف (ڈی پی اے، اے ایف پی)