والد پر اپنے ہی بچوں کے ساتھ جنسی زیادتی کا الزام

ہالینڈ میں ایک شخص پر جمعرات کو اپنے ہی دو بچوں کے ساتھ جنسی زیادتی میں ملوث ہونے کا الزام عائد کیا گیا۔

67 سالہ ملزم دارالحکومت ایمسٹرڈیم سے دو گھنٹے کے فاصلے پر ایک غير آباد علاقے میں واقع ایک فارم ہاؤس میں کئی برسوں سے اپنے اہل خانہ کے ساتھ دنیا سے کٹ کر رہائش پذیر تھا۔ 

گزشتہ ماہ پولیس نے مذکورہ شخص کو گرفتار کر کے بچوں کو بازیاب کرا لیا تھا۔

ڈچ استغاثہ نے بتایا کہ یہ شخص اپنے دو بڑے بچوں کو جنسی زیادتی کا نشانہ بناتا رہا اور  وہ دونوں بچے یہ فارم چھوڑ چکے تھے۔ اب وہ کسی الگ مقام پر رہائش پذیر ہیں۔

ملزم کا نام جوزف بتايا گيا ہے جو کہ نو بچوں کا باپ ہے جبکہ نو میں سے چھ بچوں کی والدہ کا سن 2004 میں اسی فارم پر انتقال ہو گیا تھا۔

روئنروولڈ نامی قصبے  میں واقع اس فارم کا مالک ایک 58 سالہ آسٹرین شہری ہے۔ تفتیش کاروں کو فارم پر ملنے والے دستاویز سے معلوم ہوا کہ یہ آسٹرین شہری جوزف کا رشتہ دار تھا اور اس نے فارم جوزف کو کرائے پر دیا تھا۔

ڈچ والد اور فارم کے مالک کے خلاف ایک اور مقدمہ بھی دائر کیا گیا ہے۔ استغاثہ کے مطابق مذکورہ افراد نے ایک 69 سالہ آسٹرین شہری کو سن 2009 میں متعدد ماہ تک اس کی مرضی کے بغیر اپنی تحویل میں رکھا۔

ع آ / ع س (AP, AFP)