پالی وُڈ: پشتو سینما آخری سانسیں لیتا ہوا

تین سینما گھروں پر بم حملے کیے گئے یا اُنہیں نذرِ آتش کرتے ہوئے راکھ کے ڈھیر میں تبدیل کر دیا گیا۔ کچھ دیگر سینما گھروں کے باہر بم دھماکے کیے گئے۔ پاکستانی صوبے خیبر پختونخوا کے دارالحکومت پشاور میں اب محض چند ایک سینما گھر ہی ایسے ہیں، جو اب تک بم حملوں سے محفوظ رہے ہیں۔ ان سینماؤں میں بھی ہمسایہ ملک بھارت کی فلمی صنعت بالی وُڈ کی تیار کردہ فلمیں زیادہ کامیابی سے چلتی ہیں جبکہ پشتو زبان میں بنائی گئی فلموں کی مانگ بہت حد تک کم ہو چکی ہے۔

پشاور کے ایک شہری نے خبر رساں ادارے روئٹرز سے باتیں کرتے ہوئے بتایا:’’ایسے خاندان بھی ہیں (خیبر پختونخوا میں)، جو فلموں میں گلوکارہ بن جانے والی اپنی کسی بیٹی کو جان سے مار ڈالتے ہیں۔ لوگ گیتوں سے تو محبت کرتے ہیں، گانے والوں (والیوں) سے نہیں۔‘‘

پشتو فلمیں زیادہ تر صوبہء پنجاب کے دارالحکومت لاہور میں بنتی ہیں اور ان کی تیاری میں معیار کا زیادہ خیال نہیں رکھا جاتا۔ ہر فلم کی ایک ہی طرح کی کہانی ہوتی ہے، جس میں محبت، بہادری اور پشتون شناخت کو پیش کیا جاتا ہے۔ ان کے ہیرو درمیانی عمر کے لمبی لمبی مونچھوں والے اور بھاری اسلحے سے لیس مرد ہوتے ہیں، جو اپنے سے کہیں کم عمر اور ایک کے بعد دوسرا نغمہ گاتی اور کولہے مٹکاتی ہیروئنوں کے ساتھ پہاڑوں میں گھومتے پھرتے دکھائی دیتے ہیں۔

قتل و غارت گری کے مناظر سے بھرپور پشتو فلموں میں بندوقوں، تلواروں، چاقوؤں کا بے دریغ استعمال دکھایا جاتا ہے۔ ان فلموں کے پوسٹروں پر اکثر وحشیانہ آنکھوں والے ایسے مرد دکھائے گئے ہوتے ہیں، جو ایک ایک وقت میں تین تین سگریٹوں کے کش لگا رہے ہوتے ہیں۔

جن سینماؤں میں یہ فلمیں چلتی ہیں، اُن میں سے ایک پشاور کا ارشد سینما بھی ہے۔ کہنے کو تو اس میں پرائیوٹ باکسز بھی ہیں لیکن اندر کا منظر تاریک ہے اور کسمپرسی کی تصویر بنا نظر آتا ہے۔ اس کی پتھریلی سیڑھیاں گرد سے اٹی ہوئی ہیں، دیواریں شکستہ ہیں اور چھت سے ننگی تاریں لٹکی دکھائی دیتی ہیں۔ اس سینما گھر کے بالکل سامنے ایک آٹھ منزلہ جدید میڈیکل سینٹر ہے، جسے اُس پشتو سینما کی زمین پر تعمیر کیا گیا ہے، جسے تباہ کر دیا گیا تھا۔

ارشد سینما کے پروجیکٹر عشروں پرانے ہیں اور چلتے وقت شور کرتے ہیں۔ پردہء اسکرین پر نظر آنے والی تصویر اکثر غیر واضح ہوتی ہے اور آواز بھی خلل کا شکار ہوتی ہے۔ تاہم ارشد سینما کے مینیجر خالد خان نے بتایا:’’لوگ پشتو فلموں کو پسند کرتے ہیں کیونکہ یہ معاشرے کی کہانیوں پر مبنی ہوتی ہیں۔ تاہم جب لوگ میڈیا میں یہ سنتے ہیں کہ چار یا پانچ خود کُش حملہ آور پشاور میں داخل ہو گئے ہیں تو پھر کوئی بھی سینما میں نہیں آتا۔ ہمیں بہت نقصان ہو رہا ہے۔‘‘

فلم بینوں کی تعداد میں کمی کی ایک اور وجہ یہ بھی ہے کہ یہ فلمیں نہ صرف ایک ہی جیسے گھسے پٹے موضوعات پر بنائی جاتی ہیں بلکہ اب اِن میں فحاشی بھی حدوں کو چھونے لگی ہے۔ 70 سالہ صفدر خان نے بتایا:’’پہلے ہم سینماؤں میں جو فلمیں دیکھتے تھے، اُن میں حقیقی مسائل پر مبنی کہانیاں ہوا کرتی تھیں۔ آج کل سینما گھروں میں جانے کو ایک برا اور شرم ناک فعل خیال کیا جاتا ہے کیونکہ اب ان فلموں میں عریانیت ہوتی ہے۔‘‘

اسکرپٹ رائٹر نذیر بھٹی کے خیال میں موضوعات کی یکسانیت کی وجہ سے پشتو فلمیں زوال کا شکار ہیں۔ ایک اخبار کے ساتھ باتیں کرتے ہوئے اُن کا کہنا تھا:’’مَیں نے یہ کام اُس وقت چھوڑ دیا، جب مجھے ایک فلسماز نے یہ کہا کہ مَیں اُس میں کچھ بیہودہ مکالمے بھی شامل کروں۔‘‘

ایک زمانے میں ثقافت، تجارت، فن تعمیر اور تعلیم کا مرکز سمجھے جانے والے پشاور شہر میں اب ہر طرف رَش، افراتفری اور تشدد نظر آتا ہے۔

(aa/ai(reuters