پاکستان میں اومیکرون کا پھیلاؤ اور کم زور ویکسینیشن مہم

پاکستان میں کورونا وائرس کی نئی قسم اومیکرون کے شکار افراد کی تعداد میں تیزی سے اضافہ دیکھا جا رہا ہے اور حکام کو خدشہ ہے کہ اگلے چند روز میں پاکستان اس وائرس کی پانچویں لہر کا مقابلہ کر رہا ہو گا۔ پاکستان میڈیکل ایسوسی ایشن کے سیکریٹری جنرل قیصر سجاد نے جرمن خبر رساں ادارے ڈی پی اے سے گفتگو میں کہا، ''ہمیں خدشہ ہے کہ آئندہ چند ہفتوں میں وبا کی پانچویں لہر ہمیں ہدف بنا سکتی ہے۔‘‘

پاکستان میں اومیکرون وائرس کے پہلے کیس کی تصدیق کر دی گئی

پاکستان کے سیاحتی علاقوں میں کورونا کیا کر رہا ہے؟

سجاد نے اس کی وجہ ملک میں کورونا ویکسین لگانے سے کترانے اور عوامی مقامات پر بڑے پیمانے پر سماجی فاصلے سے متعلق پابندیوں کو خاطر میں نہ لانے کے رویوں کو قرار دیا۔ انہوں نے کہا کہ پاکستان میں فیس ماسک پہننے کا رجحان نہایت کم ہے اور کورونا وائرس کے پھیلاؤ کے اعتبار سے یہ عنصر اہم کردار ادا کر سکتا ہے۔

نئی لہر سے نمٹنے کی تیاری

دوسری جانب وزیراعظم کے خصوصی مشیر برائے طبی خدمات فیصل سلطان نے ڈی پی اے کو بتایا، ''ہم نئی لہر سے لڑنے کی تیاری کر رہے ہیں، لیکن فی الحال نہ تو کورونا کیسز کی تعداد میں اضافہ ہوا ہے اور نہ ہی ہسپتالوں پر کوئی بوجھ ہے۔‘‘

انہوں نے کہا کہ کورونا وائرس کی نئی لہر کے خدشات موجود ہیں تاہم اب تک اومیکرون ویرئینٹ کے کیسز میں خطرناک اضافہ نہیں دیکھا گیا ہے۔ انہوں نے تاہم عوام سے اپیل کی کہ وہ ماسک کا استعمال کریں اور جلد از جلد ویکسینیشن لگوائیں۔

پاکستان میں کورونا کیسز کی مجموعی تعداد

واضح رہے کہ پاکستان میں 13 دسمبر کو اومیکرون کا پہلا کیس سامنے آیا تھا اور اب یہ تعداد 79 ہو چکی ہے۔ کورونا وائرس کی چوتھی لہر کے بعد گو کہ پاکستان میں زندگی ایک طرح سے معمول پر دکھائی دیتی ہے، تاہم حکام نے نئی لہر کی روک تھام کے لیے کچھ سفری پابندیاں عائد کی ہیں۔ گزشتہ چوبیس گھنٹوں میں پاکستان میں کورونا وائرس کے 378 نئے کیس جب کہ کم از کم چھ ہلاکتیں ریکارڈ کی گئی ہیں۔ عالمی وبا کے آغاز سے اب تک پاکستان میں مجموعی طور پر ایک لاکھ انتیس ہزار چار سو اُناسی افراد میں اس وائرس کی تشخیص ہو چکی ہے جب کہ 28 ہزار نو سو اٹھارہ افراد ہلاک ہوئے ہیں۔ پاکستان میں اب تک تیس فیصد سے بھی کم آبادی نے کورونا سے مدافعت کی ویکسین لگوائی ہے۔

ع ت /  ع آ (ڈی پی اے)