راکٹ لانچر شیل کا دھماکہ، پاکستانی خاندان کے نو افراد ہلاک

پاکستانی دارالحکومت اسلام آباد سے بدھ ستائیس ستمبر کو ملنے والی رپورٹوں کے مطابق پولیس نے بتایا کہ ایک ہی خاندان کے کم از کم نو افراد کی ہلاکت کا باعث بننے والا یہ دھماکہ صوبہ سندھ کے قصبے کشمور میں متاثرہ خاندان کے گھر کے اندر ہوا۔

پاکستان: سیلاب کے ایک سال بعد بھی لاکھوں بچے امدد کے منتظر

یہ شیل کبھی استعمال نہیں ہوا تھا اور بارودی مواد سے بھرا ہوا تھا۔ اس کے باوجود کشمور کے اس خاندان نے لاعلمی میں اسے اپنے گھر میں ہی رکھا ہوا تھا، جو حادثاتی طور پر پھٹ گیا۔

شیل بچوں کو ایک میدان سے ملا تھا

مقامی پولیس کے سربراہ کاظم حسین نے جرمن خبر رساں ادارے ڈی پی اے کو بتایا کہ نو ہلاک شدگان میں چار بچے بھی شامل ہیں، جن کی عمریں ایک سال سے لے کر بارہ سال تک کے درمیان تھیں۔ مرنے والے باقی پانچوں افراد اس خاندان کے بالغ ارکان تھے۔

پاکستان: جادو ٹونے کے لیے انسانی اعضاء کا استعمال

کاظم حسین نے مزید بتایا کہ راکٹ لانچر کا یہ شیل اس گھرانے کے بچوں کو ایک مقامی میدان سے ملا تھا اور وہ اسے گھر لے آئے تھے۔ بظاہر یہ دھماکہ اس شیل کے کافی زیادہ حدت کے ساتھ رابطے کے نتیجے میں ہوا۔

ملالہ نے دادو کے ٹینٹ سٹی میں اسکول قائم کر دیا

پولیس کے مطابق کشمور اور اس کے ارد گرد کے علاقے میں راکٹ لانچروں کا استعمال عام ہے اور انہیں سندھ کے قبائلی علاقوں میں خونریز تنازعات کے فریقین ایک دوسرے کے خلاف استعمال کرتے ہیں۔

اس کے علاوہ اندرون سندھ کے دور دراز علاقوں میں ایسے غیر قانونی راکٹ لانچر اور ان کے ذریعے فائر کیے جانے والے شیل ڈاکوؤں کے مسلح گروہ بھی استعمال کرتے ہیں۔

م م / ا ا (ڈی پی اے، اے پی)