پاکستان میں مسلسل شدید گرمی، کراچی میں پچاس سے زائد اموات

پاکستانی دارالحکومت اسلام آباد سے جمعرات چار جولائی کو ملنے والی رپورٹوں کے مطابق ملک میں موجودہ موسم گرما کے دوران انتہائی نوعیت کے موسمی حالات کی جو لہر اس وقت اپنے تیسرے ہفتے میں ہے، اس کی وجہ سے خاص طور پر ملک کے سب سے بڑے شہر اور صوبہ سندھ کے دارالحکومت کراچی میں ہسپتال بھرے ہوئے ہیں اور مردہ خانے بھرتے جا رہے ہیں۔

اس کی وجہ یہ ہے کہ اس بندرگاہی شہر میں سینکڑوں کی تعداد میں عام شہری شدید گرمی کے باعث ہیٹ اسٹروک جیسی طبی شکایات کے ساتھ مقامی ہسپتالوں میں لائے جاتے ہیں۔ ایسے افراد جو انتہائی گرمی کی تاب نہ لاتے ہوئے ہلاک ہو جاتے ہیں، ان کی لاشوں کی قانونی شناخت کے پیچیدہ عمل اور اس میں تاخیر کے سبب اب شہر کے مردہ خانے بھی بھرتے جا رہے ہیں۔

کراچی میں پچاس سے زائد ہلاکتوں کی تصدیق

پاکستان میں شدید گرمی کی موجودہ لہر گزشتہ ماہ کے دوسرے نصف حصے میں شروع ہوئی تھی۔ کراچی پولیس کی خاتون ترجمان سمیہ سید کے مطابق اس لہر کے دوران صرف اسی شہر میں آج جمعرات تک 50 سے زائد افراد کی جان جا چکی ہے۔ ان میں سے زیادہ تر ہیٹ اسٹروک کا شکار ہوئے۔

صوبائی دارالحکومت کراچی کے سب سے بڑے ہسپتال جناح پوسٹ گریجویٹ میڈیکل سینٹر کے ترجمان حسن علی نے جرمن نیوز ایجنسی ڈی پی اے کو بتایا کہ صرف کل بدھ کے روز ہی اس ہسپتال میں ہیٹ اسٹروک سے متاثرہ درجنوں نئے مریض لائے گئے۔

کراچی میں محکمہ موسمیات کے اعلیٰ اہلکار سردار سرفراز کے مطابق بدھ کے روز شہر میں درجہ حرارت 55 ڈگری سینٹی گریڈ تک پہنچ گیا تھا۔ موسمیاتی ماہرین کے مطابق درجہ حرارت اور ہوا میں نمی کی شرح کے امتزاج سے طے کیے جانے والے ہیٹ انڈکس کا 55 ڈگری تک پہنچ جانا انتہائی غیر معمولی بات تھی۔

ساحلی شہر کراچی کی آبادی 20 ملین سے زیادہ ہے اور وہاں بدھ کے دن ریکارڈ کیا گیا 55 ڈگری سینٹی گریڈ درجہ حرارت اتنا زیادہ تھا، جتنا پہلے کبھی دیکھنے میں نہیں آیا تھا۔

اتنی زیادہ گرمی کئی حوالوں سے ناقابل برداشت

چیف میٹیورولوجسٹ سردار سرفراز نے بتایا، ''اتنا زیادہ درجہ حرارت کئی حوالوں سے عام لوگوں کے لیے ناقابل برداشت ہوتا ہے۔ ایسا اس لیے بھی ہوتا ہے کہ سمندر سے آنے والے ہوا بند ہو جاتی ہے اور ہوا میں نمی کا تناسب بڑھ کو 55 فیصد یا اس سے بھی زیادہ تک پہنچ جاتا ہے۔‘‘

ملک گیر سطح پر فعال فلاحی تنظیم ایدھی فاؤنڈیشن کا کراچی میں بھی ایمبولینسوں اور مردہ خانوں کا نیٹ ورک سب سے بڑا ہے۔ اس فاؤنڈیشن کے مطابق شدید گرمی کی وجہ سے ہونے والی انسانی ہلاکتوں کی اصل تعداد سرکاری طور پر بتائے گئے اعداد و شمار سے کہیں زیادہ ہو سکتی ہے۔

ایدھی فاؤنڈیشن کے ترجمان محمد امین نے نیوز ایجنسی ڈی پی اے کو بتایا، ''ہمارے ریسکیو کارکن عام طور پر روزانہ کراچی شہر سے 30 اور 40 کے درمیان لاشیں اٹھاتے یا وصول کرتے ہیں۔ لیکن بدھ تین جولائی کے روز ان لاشوں کی یومیہ تعداد 140 سے زائد رہی۔‘‘

محمد امین کا کہنا تھا۔ ''یہ رجحان ہم اس وقت سے دیکھ رہے ہیں، جب سے شدید گرمی کی لہر شروع ہوئی ہے۔ ہمارے ریکسیو کارکن اب ہر روز کراچی میں جتنی لاشیں وصول کرتے یا اٹھاتے ہیں، ان کی تعداد 100 سے زیادہ ہی رہتی ہے۔‘‘

ماحولیاتی تبدیلیوں اور ان کے نتائج سے بری طرح متاثر ہونے والے ممالک میں پاکستان بھی شامل ہے، جسے ان دنوں امسالہ گرمیوں کے دوران شدید گرمی کی دوسری لہر کا سامنا ہے۔ پہلی لہر جون کے اوائل میں دیکھی گئی تھی، جب کئی پاکستانی شہروں میں درجہ حرارت 50 ڈگری سینٹی گریڈ سے تجاوز کر گیا تھا۔

م م / ا ا (ڈی پی اے)